وزىنە سەنىمسىز، اشۋشاڭ ادامنان ۇنەمى كۇلىپ جۇرەتىن باقىتتى جانعا اينالدىم - 30 كەلى سالماق تاستاعان ايەل

استانا. KAZINFORM - ەلىمىزدە ارتىق سالماقتان زارداپ شەگىپ جۇرگەندەر سانى جىل وتكەن سايىن ارتىپ بارادى. ءتىپتى سەمىزدىككە شالدىققان بالالار دا كۇرت كوبەيگەن. وسى رەتتە، Kazinform ءتىلشىسى ديەتولوگ ايىم كاسەمبايەۆامەن سۇحبات قۇرىپ، كوپتى تولعاندىرعان سۇراقتارعا جاۋاپ الىپ كوردى. ونىڭ ءوزى قىسقا ۋاقىت ىشىندە ارتىق سالماقتان ارىلىپ، ءومىرىن تۇبەگەيلى وزگەرتكەن.

- ادام ديەتانى قالاي ۇستاعانى دۇرىس؟

- ءوز باسىم «ديەتا» دەگەن ءسوزدى قۇپتامايمىن. سەبەبى ديەتا دەگەنىمىز بەلگىلى ءبىر ۋاقىتقا، بەلگىلى ءبىر مولشەرگە نەگىزدەلگەن. ديەتا ۇستاعان ادام تاماقتان باس تارتىپ، اشىعىپ جۇرەدى. ودان كەيىن ارادا ءبىراز ۋاقىت وتكەندە باس تارتقان تاعامدارىن قايتادان قوماعايلانا جەي باستايدى. وسىلايشا، ول تاستاعان سالماعىنان 2-3 ەسە كوپ كەلى قوسىپ الادى. سوندىقتان ءوزىم دۇرىس تاماقتانۋ ءسوزىن قولدانامىن.

- ءوزىڭىز 30 كەلى سالماق تاستاعان ەكەنسىز. بۇعان قانشا ۋاقىت كەتتى؟

- سالماعىم 106 كەلى بولدى. ءوزىمدى جاسى ءبىرازعا كەلىپ قالعان كىسىدەي سەزىنەتىنمىن. پسيحولوگيالىق تۇرعىدا دا وتە اۋىر بولدى. ەشقايدا شىققىم كەلمەيتىن. ۇيالاتىنمىن. ءسال جۇرسەم بەلىم سىزداپ، اياعىم قاقساپ، سۇمەك تەرگە مالىناتىنمىن. الدىمداعى اس-سۋدى قىرت ەتكىزىپ تىستەپ، قىلت ەتكىزىپ جۇتا بەرەتىنمىن. ءتۇرلى اۋرۋلاردىڭ بارلىعى دەرلىك ارتىق سالماقتان ەكەن.

فوتو: كەيىپكەردىڭ جەكە مۇراعاتىنان

ودان كەيىن بەرىلمەيمىن، كۇرەسەمىن دەپ شەشتىم. ديەتا ۇستادىم. تاڭەرتەڭ قاراقۇمىق جەپ، ەتتەن باس تارتىپ، تۇستە ايران ءىشىپ، كەشكى 6 دان كەيىن تاماقتى مۇلدە تاتىپ الماي ءجۇردىم. باسقا دا ديەتانىڭ تۇرلەرىن كوردىم. ءبىراق ناتيجە بولمادى. ايتەۋىر، ديەتولوگتارمەن كەڭەسىپ، دۇرىس تاماقتانۋدىڭ جولىن بىلگەننەن كەيىن عانا ارتىق سالماقتان ارىلا باستادىم. ءبىر جىلدىڭ ىشىندە 30 كەلى سالماق تاستادىم. وسىنداعى 20 كەلىدەن 3 ايدا ارىلدىم. شىن نيەت پەن ەرەن ەڭبەك بولسا ءبارى مۇمكىن ەكەنىنە كوزىم جەتتى!

ادامداردىڭ كوبى ارتىق سالماقتان قۇتىلعىسى كەلگەنمەن، قينالعىسى كەلمەيدى. پسيحولوگتارعا، ماسساجعا بارىپ جاتادى. ءبىراق نەگىزىنەن سالماق تاستاۋدىڭ 80 پايىزى - تاماقتانۋعا بايلانىستى. ال قالعان 20 پايىزى - سپورتتان. ەڭ اۋەلى تاڭعى استان باستايمىز. تاڭەرتەڭ مىندەتتى تۇردە تاماقتانۋ قاجەت.

كۇن سايىن 18.00 گە دەيىن 2 ليتردەن استام سۋ ءىشۋىمىز كەرەك. ادام دەنەسىنىڭ 70-75 پايىزى سۋدان تۇرادى. ءبىر تاۋلىكتەگى قيمىل- قوزعالىستان، سويلەگەننەن اعزاداعى 1,7 ليتر سۋ جوعالادى. ونىڭ ورنىن تولىقتىرىپ وتىرۋعا ءتيىسپىز. تاعى ءبىر ماڭىزدى جايت - ۇيقى. 23.00 مەن 01.00 ارالىعى - سۇلۋلىق ۇيقىسى دەپ اتالادى. سول ارالىقتا ۇيقىعا باس قويىڭىز. كۇنىنە 7 ساعاتتان كەم ۇيىقتاماڭىز. سەبەبى ۇيىقتاعان كەزدە اعزامىز تىنىعىپ، ارتىق سالماقپەن ءوزى كۇرەسەدى.

ال ەتتى جەگەن دۇرىس. «از تاماق ىشسەم سالماقتى تەز تاستايمىن» دەپ ويلايتىندار بار. بۇل جاڭساق پىكىر. قولىمىزدىڭ ەكى الاقانى كولەمىندە پايدالى ينگرەديەنتتەردەن جاسالعان سالاتتى، ءبىر الاقان مولشەرىندە اق ەتتى، ياعني بالىقتىڭ، تاۋىقتىڭ ەتىن جەيمىز. گارنيردى كەرىسىنشە، وتە از جەۋىمىز كەرەك. سەمىزدىكتى جەڭەمىن دەگەن ادامعا گازدالعان سۋسىنداردى، كارتوپتى، كۇرىشتى، تاتتىلەردى، جەمىستەردەن بانان مەن ءجۇزىمدى ءبىراز ۋاقىت بويى جەمەۋگە كەڭەس بەرەمىن. ءبىر ستاقان گازدالعان سۋدىڭ كولورياسىن اعزامىزدان شىعارۋ ءۇشىن 10 مىڭ قادام جاساۋىمىز كەرەك ەكەن. بىرنەشە ستاقان ىشسەڭىز، قانشا زيان كەلەتىنىن وسىدان-اق ويلاي بەرىڭىز.

فوتو: كەيىپكەردىڭ جەكە مۇراعاتىنان

اتا-اناسى بالاسىنا ۇلگى بولا ءبىلۋى قاجەت. شوكولاد بەرە بەرگەنشە ءتۇرلى جەمىس-جيدەك، كوكونىس الىڭىز. بالا جەمەيدى ەمەس، جەيدى. پايداسى كوپ. سۋ ءىشىپ ءجۇرۋدى ۇيرەتىڭىز. پەرزەنتىڭىزدىڭ كوزىنشە سپورتپەن اينالىسىڭىز. ءبارىن وزىڭىزدەن باستاساڭىز، باۋىر ەتى بالاڭىز دا ارتىق سالماقتان زارداپ شەكپەيدى.

- ديەتا ۇستاۋدى باستاي الماي جۇرگەندەرگە قانداي كەڭەس ايتاسىز؟

- وزىڭىزگە ناقتى ماقسات قويىڭىز. جالقاۋلىقتى جەڭىپ، سول ماقساتقا جەتۋ ءۇشىن بارىڭىزدى سالىڭىز.

- ءوزىڭىز ارتىق سالماقتان ارىلعاننان كەيىن ءومىرىڭىز قالاي وزگەردى؟

- كۇرت وزگەردى. ءوز- وزىنە سەنىمسىز، ىلعي تاماقتى ويلايتىن، اشۋشاڭ ادامنان ۇنەمى كۇلىپ جۇرەتىن، اشىق، ەڭ باستىسى باقىتتى جانعا اينالدىم. يميدجىمدى وزگەرتىپ، اينالاعا باسقالاي قارايتىن بولدىم. ءومىر دەگەن عاجاپ قوي، شىركىن! بۇرىن باسقا الەمدە جۇرگەندەي ەكەنمىن. ءوزىڭدى جەڭىل، ادەمى سەزىنۋ دەگەن كەرەمەت سەزىم.

فوتو: كەيىپكەردىڭ جەكە مۇراعاتىنان

باياعىدا دۇكەنگە بارعاندا سوڭعى ولشەمدەردى سۇرايتىنمىن. ولشەمى وسكەن سايىن كيىمنىڭ باعاسى دا قىمباتىراق. ساتۋشىلاردىڭ «سىزگە كەلەتىن ولشەم جوق» دەگەن ءسوزى جۇرەگىمە ينەدەي قادالاتىن. ال قازىر دۇكەنگە قۋانا- قۋانا بارامىن. «وسىنى كيىپ كورىڭىزشى. مىنا كيىم سىزگە جاراساتىن سەكىلدى» دەپ ساتۋشىلار قاۋمالاعاندا قايسىسىن كيەرىمدى دە بىلمەي قالامىن.

سول ءۇشىن ارتىق سالماعى بار ايەلدەردى ەشقاشان بەرىلمەۋگە شاقىرامىن! ءوزىڭىزدى وزگەرتسەڭىز، ءومىرىڭىز وزگەرەدى!

- اڭگىمەڭىزگە كوپ راحمەت!

اۆتور
تالعاتجان مۇحامەتبەك ۇلى