«وزبەكتىڭ جيرينوۆسكيى» تاشكەنت باتىلى بارماعان مالىمدەمەلەردى ايتىپ ءجۇر

استانا. قازاقپارات - وزبەك دەپۋتاتى الىشەر قادىروۆتى كوپشىلىك ومىردەن وتكەن رەسەيلىك ۇلتشىل ساياساتكەر ۆلاديمير جيرينوۆسكيمەن سالىستىرادى.

دەپۋتات ورىنسىز مالىمدەمەلەر جاساپ، رەسەي تۋرالى ويىن «بۇكپەسىز» ايتادى. مۇنداي مالىمدەمەلەردى وزبەكستاننىڭ باسقا وكىلەتتى تۇلعالارىنان نەمەسە سىرتقى ىستەر مينيسترىنەن ەستىمەيسىز.

وسى اپتادا وزبەكستانداعى مەكتەپتەردىڭ بىرىندە بولعان وقيعا رەسەي مەن وزبەكستان اراسىنداعى رەسمي داۋعا ۇلاستى. بۇل جولى رەسەي سىرتقى ىستەر مينيسترلىگىنىڭ ساركازمعا سالىپ، سەنىمدى سويلەيتىن باسپا ءسوز حاتشىسى ماريا زاحاروۆاعا «لايىقتى قارسىلاس» تابىلدى.

وقيعا 23 -قىركۇيەكتە تاشكەنتتەگى مەكتەپتەردىڭ بىرىندە بولعان. ورىس ءتىلى مۇعالىمى 10 جاستاعى بالانىڭ قۇلاعىن بۇراپ، بەتىنەن ۇرعان. بۇعان وقۋشىنىڭ مۇعالىمنەن «نەگە ورىسشا سويلەمەيسىز؟» دەپ سۇراۋى سەبەپ بولعان.

وقيعا ورنىنان تۇسىرىلگەن ۆيدەو ينتەرنەتتە كەڭ تاراپ، رەسەيلىك قولدانۋشىلار ۆيدەونى قىزۋ تالقىلادى.

25 -قىركۇيەكتە رەسەي سىرتقى ىستەر مينيسترلىگىنىڭ باسپا ءسوز حاتشىسى ماريا زاحاروۆا اقپارات قۇرالدارىنا بەرگەن سۇحباتىندا «ماسكەۋ وزبەكستاننان رەسمي تۇسىنىكتەمە بەرۋدى سۇراعانىن» ايتتى. زاحاروۆا وقيعانى زەرتتەپ، مۇعالىمگە قارسى شارا قولدانۋعا شاقىردى.

رەسەيدىڭ وزبەك مەكتەپتەرىندەگى جاعدايعا ارالاسۋى وزبەكستان حالقىنىڭ دا شامىنا ءتيدى.

وزبەكستان پارلامەنتى تومەنگى پالاتاسى ءتوراعاسىنىڭ ورىنباسارى الىشەر قادىروۆ Telegram-دا زاحاروۆاعا جاۋاپ بەردى.

«[رەسەي] ءبىزدىڭ ىشكى ىسىمىزگە ارالاسقانشا، ءبىر باسىنا جەتىپ-ارتىلىپ جاتقان ءوز ماسەلەلەرىن شەشسە، جاقسى بولار ەدى»، - دەپ جازدى «ميلليي تيكلانيش» (ۇلتتىق جاڭعىرۋ) دەموكراتيالىق پارتياسىنىڭ باسشىسى قادىروۆ.

«وزبەكستان مەكتەبىندە وزبەك بالانىڭ قۇقىعىنىڭ بۇزىلۋىن زەرتتەۋ وزبەك زاڭدارىنا ساي جۇرەدى. جوق جەردەن شۋ شىعارۋدىڭ قاجەتى جوق»، - دەدى دەپۋتات.

قادىروۆ - تەپە-تەڭدىك پەن تىنىشتىقتى جانى سۇيەتىن وزبەكتىڭ ساياسي ەليتاسىنداعى ورنى بولەك قۇبىلىس. ول شۋ شىعارۋ جولدارىن جاقسى بىلەدى.

وسى ايدىڭ باسىندا ورتالىق ازيا بويىنشا ساراپشى بريۋس پاننيەر Times of Central Asia گازەتىنە جازعان ماقالاسىندا دەپۋتاتتى «وزبەكستانداعى رەسەيلىك شوۆينيزمگە قارسى كۇرەسىپ جۇرگەن باس تۇلعا» دەپ اتاعان.

«وزبەكستاننىڭ ساياسي جۇيەسى اۆتوريتار ەكەنىن ەسكەرسەك، قادىروۆ بيلىكتەگى جوعارى شەندى تۇلعالاردىڭ ماقۇلداۋىنسىز مۇنداي مالىمدەمەلەر جاساي الماس ەدى»، - دەيدى پاننيەر. ساراپشى كادىروۆتىڭ سوۆەت وداعى مەن ورىس ناتسيوناليزمىنە قاتىستى بىرنەشە پىكىرىن مىسالعا كەلتىرەدى.

ماسەلەن، دەپۋتات جىل باسىندا رەسەيلىك ساياساتكەر ءارى عالىم ورتالىق ازيا حالىقتارى مەن ولاردىڭ تاريحىن قورلايتىن مالىمدەمە جاساعان سوڭ، وزبەكستانداعى رەسەيلىك ارنالاردى جاۋىپ تاستايىق دەگەن ۇسىنىس جاساعان.

قادىروۆتى «وزبەك جيرينوۆسكيى» دەپ اتايدى. ۆلاديمير جيرينوۆسكي رەسەيدىڭ ۇلتشىل ساياساتكەرى بولعان. ول كوزى تىرىسىندە ۇنەمى رەسەيدىڭ پوستسوۆەتتىك ەلدەرگە قاتىستى ساياساتىنا بەلسەندى ارالاسىپ، داۋلى مالىمدەمەلەر جاساعان.

قادىروۆتىڭ وزىنە مۇنداي تەڭەۋ ۇنامايدى.

2022 -جىلى قازاندا قادىروۆ بريتاندىق جۋرناليست دجواننا ليلليسپەن اڭگىمەدە جيرينوۆسكيي سياقتى شوۆينيست ەمەستىگىن، وزبەكستاننىڭ «ۇلتتىق ءداستۇر مەن قۇندىلىقتارعا ۇيلەسە وتىرىپ دامىعانىن قولدايتىنىن» ايتقان.

قادىروۆ - وزبەكستان ءۇشىن تىڭ قۇبىلىس. ەلدى 25 جىلعا جۋىق باسقارعان يسلام كاريموۆتىڭ تۇسىندا پرەزيدەنتتىڭ وزىنەن باسقا ەشكىم مۇنداي وتكىر سوزدەر ايتا المايتىن.

13 جىل پرەمەر-مينيستر بولعان ميرزيايەۆتىڭ ءوزى كاريموۆ قايتىس بولعاننان كەيىن عانا جارىققا شىعىپ، تۇلعا رەتىندە اشىلدى.

وزبەكستاننىڭ ديپلوماتيالىق قاۋىمداستىعى دا ءوزىن بۇرىننان ساق ۇستايدى. ءبىراق تاشكەنت قازىرگى گەوساياسي جاعدايعا جاڭا ءادىس كەرەك دەپ شەشكەن سياقتى.

27 -قىركۇيەكتە Telegram-داعى رەسمي ارناسىندا وزبەكستاننىڭ سىرتقى ىستەر ءمينيسترى باحتيەر سايدوۆ نيۋ-يوركتەگى ب ۇ ۇ- نىڭ باس اسسامبلەياسىنا ساپارىن قورىتىندىلاي كەلە، رەسەيدىڭ سىرتقى ىستەر ءمينيسترى سەرگەي لاۆروۆپەن كەلىسسوز جۇرگىزگەنىن جازدى.

سايدوۆتىڭ جازۋىنشا، كەلىسسوز كەزىندە تاراپتار «ەكىجاقتى سەنىمدى نىعايتۋ ءۇشىن ءبىر-ءبىرىنىڭ ىشكى ىسىنە ارالاسپاۋ ماڭىزدى» دەگەن توقتامعا كەلگەن.

ءبىراق مۇنداي مالىمدەمەلەر جالپى حالىققا ەمەس، ءسوزدىڭ استارىن تۇسىنەتىن بەلگىلى ءبىر تۇلعالارعا عانا ارنالادى. ونى بايقاپ، كوپشىلىككە جىلىگىن شاعىپ، تالداپ بەرۋ ءۇشىن الىشەر قادىروۆ سياقتى ادامدار كەرەك.

«ازاتتىق» راديوسى