وزبەكستاننىڭ بوكستان التىندى كۇرەپ الۋىنىڭ سىرى بەلگىلى بولدى

استانا. قازاقپارات - پاريجدە وتكەن وليمپيادا ويىندارىندا بوكستان 13 التىن، 13 كۇمىس جانە 26 قولا مەدال ساراپقا سالىندى. ونىڭ جەتەۋى ەرلەر قۇراماسىنا جانە التاۋى ايەلدەرگە تيەسىلى، دەپ حابارلايدى  inbusiness.kz.

ەرلەر اراسىندا مەدالدار جيىنتىعى بويىنشا وزبەكستان كوش باستادى. 5 بىردەي بوكسشىسى التىن الىپ، ەل مەرەيىن ۇستەم ەتتى. ونىڭ ىشىندە باحودير جالولوۆ پەن حاسونباي دۋسماتوۆ وليمپيادانىڭ ەكى دۇركىن چەمپيونى اتانىپ وتىر. وسى ورايدا بارلىعىندا «وزبەكستان بوكسشىلارىنىڭ جەتىستىگىنىڭ سىرى نەدە؟» دەگەن سۇراق تۋىندايتىنى انىق.

قازىر الەۋمەتتىك جەلىلەردە وزبەكستاننىڭ 2025 -جىلعا دەيىنگى بوكستى دامىتۋ تۇجىرىمداماسى قىزۋ تالقىعا تۇسۋدە. قۇجات 2021-2022 -جىلدارى قابىلدانعان. ەل اراسىندا بوكستى ناسيحاتتاۋ ادىستەرى مەن تانىمال بوكسشىلاردىڭ ءومىرىن ءجيى كورسەتۋ ارقىلى جاس بالالاردى سپورتقا تارتۋ تەتىكتەرى كورسەتىلگەن.

وزبەكستان بيلىگى 2025 -جىلعا دەيىن بوكسپەن اينالىساتىن جاسوسپىرىمدەردىڭ سانىن 27 مىڭعا دەيىن كوبەيتۋدى جوسپارلاپ وتىر. سونداي-اق وزبەكستان قۇراماسىنىڭ مۇشەلەرى ءۇشىن تاشكەنت قالاسىندا حالىقارالىق تالاپتارعا ساي كەلەتىن 100 ادامعا ارنالعان زاماناۋي بوكس بازاسىن سالۋدى ماقسات ەتكەن.

بوكسپەن تۇراقتى تۇردە اينالىساتىن 13-17 جاس ارالىعىنداعى بالالار سانىن كوبەيتۋ. بوكسپەن ۇنەمى اينالىساتىن جوعارى ءبىلىم بەرۋ جۇيەسىندەگى I كۋرس ستۋدەنتتەرىنىڭ سانىن كوبەيتۋ. ورتا جالپى ءبىلىم بەرەتىن، ورتا ارناۋلى، كاسىپتىك جانە سپورتتىق وقۋ ورىندارىنىڭ سپورت عيماراتتارىن ءتيىمدى پايدالانۋ، - دەپ جازىلعان قۇجاتتا.