وزبەكستاندىق قازاق «التىن قالام» يەگەرى اتاندى

استانا. Kazinform - وزبەكستان رەسپۋبليكاسى پارلامەنتىنىڭ «حالىق ءسوزي» جانە «نارودنوە سلوۆو» گازەتتەرىنىڭ جاۋاپتى حاتشىسى نۇرلان ۋسمانوۆ وزبەكستاندا وتكىزىلگەن بيىلعى «التىن قالام» ۇلتتىق سىيلىعىنىڭ جۇلدەگەرى اتاندى، دەپ حابارلايدى Kazinform ءتىلشىسى.

نۇرلان وكتەم ۇلى ەڭبەك جولىن قازاق تىلىندە شىعاتىن «نۇرلى جول» گازەتىنەن باستاعان، سونداي-اق «ۋچيتەل ۋزبەكيستانا» گازەتىن باسقارعان.

نۇرلان وكتەم ۇلىنىڭ كوپ جىلدىق ەڭبەگى، شىعارماشىلىعى ءارى ىزدەنىمپازدىعى جوعارى باعالانىپ، ءداستۇرلى تۇردە وتەتىن «التىن قالام» ۇلتتىق سىيلىعىنىڭ باسپا باعىتىندا Ⅱ ورىن جۇلدەگەرى اتاندى.

بيىلعى بايقاۋعا 600-گە جۋىق جەرگىلىكتى جانە شەتەلدىك ب ا ق وكىلدەرى 4 مىڭنان استام شىعارماشىلىق جۇمىسىن تاپسىرعان.

نۇرلان وكتەم ۇلى تۋىندىلارىن ءۇش تىلدە، ياعني قازاق، وزبەك جانە ورىس تىلىندە قاتار جازادى. ونىڭ جازعان ماقالالارى مەملەكەتتىك باسىلىمدار مەن سايتتاردا عانا ەمەس، سونداي-اق باسقا ەلدەردىڭ ب ا ق- دا ءجيى جاريالانادى. سونىمەن قاتار ول قازاقستاندىق قوعامدىق ۇيىمدارمەن دە ىنتىماقتاستىق ورناتىپ، حالىقارالىق سەمينار-ترەنينگتەردە سپيكەر، مەديا-ترەنەر رەتىندە قاتىسادى.

اۆتور

بەگابات ۇزاقوۆ