وزبەكستانداعى قازاقتىلدى مەكتەپتەردە مۇعالىم جەتىسپەيدى - راسۋل كوشەربايەۆ

 بۇگىندە وزبەكستاندا 370 كە جۋىق قازاقتىلدى مەكتەپ بار. دەگەنمەن ولاردا ساباق بەرەتىن مۇعالىمدەر جەتىسپەيدى.

مۇنى استانادا ءوتىپ جاتقان شەتەلدەگى قازاقتاردىڭ «وتانداستار» فورۋمىندا ەتنيكالىق قازاق، وزبەكستان ەكولوگيا ءمينيسترىنىڭ كەڭەسشىسى راسۋل كوشەربايەۆ ايتتى، دەپ حابارلايدى Kazinform.

«قازىر وزبەكستاندا قازاق تىلىندە ءبىلىم بەرەتىن 370 كە جۋىق مەكتەپ بار. بۇل ءبىلىم وردالارىندا ماتەماتيكا، حيميا، بيولوگيا سياقتى ءبىرقاتار پاندەر بويىنشا مۇعالىمدەر جەتىسپەيدى. سونداي- اق، بۇل مەكتەپتەردە قازاق تىلىندەگى ادەبيەتتەر جوقتىڭ قاسى. بۇل - بالالاردىڭ قازاق ءتىلىن تەرەڭ مەڭگەرۋىنە قيىندىق تۋعىزىپ وتىر. بۇعان قوسا، قازاقستانعا بارىپ وقىعىسى كەلەتىن جاستار وتە كوپ. ءبىراق ولارعا قازاقستاندىق وقۋ ورىندارىنا ءتۇسۋ ءۇشىن تاپسىرۋ مىندەتتەلگەن ۇ ب ت- دان ءوتۋ مۇمكىن ەمەس. سوندىقتان شەتەلدەگى قازاق جاستارىن ارنايى ەمتيحانمەن قابىلداۋ نەمەسە اڭگىمەلەسۋ، جەڭىل تەست تاپسىرۋ ارقىلى قابىلداۋدى ۇسىنامىز»، - دەدى راسۋل كوشەربايەۆ.

ول قازاق مەكتەپتەرىندەگى ءمۇعالىم تاپشىلىعى ماسەلەسىن شەشۋ ءۇشىن وزبەكستاندىقتاردى قازاقستانعا جىبەرىپ وقىتۋ قاجەت دەپ ەسەپتەيدى. تيىسىنشە، ءبىزدىڭ ەلدىڭ ديپلومىن وزبەك تاراپى مويىنداۋى كەرەك. ال، بۇل ازىرگە شەشىلمەگەن ماسەلەنىڭ ءبىرى.

«قازاقستاندا وقىعان مامانداردىڭ ديپلومىن وزبەكستاندا مويىنداۋ - شەشىمىن كۇتىپ تۇرعان ماسەلە. وسى باعىتتا ەكى ەلدىڭ جاۋاپتى ۆەدومستۆولارى جۇمىس ىستەۋى كەرەك. سونىمەن قاتار دۇنيە ءجۇزىنىڭ ەڭ ۇزدىك 1000 ۋنيۆەرسيتەتى رەيتينگىنە ەنگەن قازاقستاندىق جوعارى وقۋ ورىندارىنىڭ فيليالىن وزبەكستاندا اشۋدى ورىندى دەپ سانايمىز»، - دەپ ۇسىنىس ايتتى راسۋل كوشەربايەۆ Kazinform اگەنتتىگىنىڭ ساۋالىنا جاۋاپ بەرە وتىرىپ.

ايتا كەتەيىك، راسۋل كوشەربايەۆ وزبەكستان پارلامەنتىنىڭ تومەنگى پالاتاسى - وليي ماجليستە 8 جىل دەپۋتات بولعان.

اۆتور

ءاليحان اسقار