وزبەكستاندا ۇيالى تەلەفون ءنومىرى 84,7 مىڭ دوللارعا ساتىلدى

 تاشكەنت. KAZINFORM - وزبەكستاندا ەڭ قىمبات تەلەفون ءنومىرى اۋكسيوندا 84,7 مىڭ دوللارعا ساتىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

وزبەك رەسپۋبليكالىق تاۋار- شيكىزات بيرجاسىنىڭ مالىمەتىنشە، 20 -ناۋرىزدا وتكەن اۋكسيون ناتيجەسىندە ۇيالى تەلەفون ءنومىرى 1,07 ميلليارد سۋمعا (84,7 مىڭ دوللار) ساتىلدى. بۇل اتالعان ساۋدا پلاتفورماسى ىسكە قوسىلعاننان بەرى ءنومىر ءۇشىن ۇسىنىلعان ەڭ جوعارى باعا.

«باستاپقى قۇنى 200 ميلليون سۋم بولاتىن بۇل ۇيالى تەلەفون ءنومىرى جەكە تۇلعالارعا ارنالعان. ءۇش ساعاتتان اسا ۋاقىتقا سوزىلعان ونلاين اۋكسيونعا 10 ۇمىتكەر قاتىسىپ، 87 رەت باعا ۇسىنىدى. ناتيجەسىندە بۇل ۇيالى تەلەفون ءنومىرىنىڭ باستاپقى قۇنى بەس ەسە ءوستى»، - دەپ ءمالىم ەتتى بيرجادان.

ءمالىم بولعانداي، اۋكسيون جەڭىمپازى بۇل ءنومىردى ۇيالى بايلانىس وپەراتورى ارقىلى 10 كۇن ىشىندە رەسىمدەپ الۋى ءتيىس.