وزبەكستاندا ورتالىق ازيا ەلدەرىنىڭ العاشقى ارت-ەكسپەديتسياسى ءجۇرىپ جاتىر
تاشكەنت. KAZINFORM - تاشكەنتتە قازاقستان، قىرعىزستان جانە وزبەكستان سۋرەتشىلەرىنىڭ بىرلەسكەن ارت-ەكسپەديتسياسى ءجۇرىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
مۇنداي اۋقىمداعى مادەني ءىس-شارا ورتالىق ازيادا العاش رەت ۇيىمداستىرىلىپ وتىر. ونىڭ بارىسىندا سۋرەتشىلەر ەجەلگى شاھارلار مەن ەسكەرتكىشتەردىڭ تاريحىن تەرەڭىرەك تانىپ، سونىڭ نەگىزىندە كارتينالاردى جارىققا شىعارۋعا نيەتتى.
ەكسپەديتسيا ەلدەر اراسىنداعى مادەني قارىم-قاتىناستى نىعايتۋ ماقساتىندا وتكىزىلىپ وتىر. ساپار ق ر ماڭعىستاۋ وبلىستىق مادەنيەت باسقارماسىنىڭ «شەبەرحاناداعى ءبىر كۇن» جوباسى اياسىندا قولعا الىنعان.
بۇعان دەيىن ارت-ەكسپەديتسياسى مۇشەلەرى حيۋا قالاسىندا بولىپ، ءداستۇرلى شىعىس ساۋلەت ونەرى نىساندارىنىڭ قازىرگى كورىنىسىن تاماشالاپ، جەرگىلىكتى ارىپتەستەرىمەن تاجىريبە الماسقان.
«جاس سۋرەتشىلەردى الىپ كەلىپ، ەكسپەديتسيا جاساپ، ءار وڭىردە توبىمىزبەن پلەنەردە ەتيۋد جازدىق. شەتەلدىك سۋرەتشىلەردىڭ شەبەرلىك ساباقتارىن كورىپ، شاكىرتتەرىمىزبەن قاتار، ءوزىمىز دە تاجىريبە الماستىق. تاشكەنتتە ورال تاڭسىقبايەۆتىڭ مۋزەيىندە بولدىق. بۇل ءبىز ءۇشىن ۇلكەن تاجىريبە. سونىمەن قاتار مۇنداي ءىس-شارالاردى وتكىزۋ قازاقستان مەن وزبەكستان اراسىنداعى مادەني قارىم-قاتىناستىڭ جوعارى دەڭگەيگە شىققانىن ايعاقتايدى»، - دەدى ق ر سۋرەتشىلەر وداعىنىڭ مۇشەسى تىنىشبەك بالتابايەۆ.
قىلقالام شەبەرلەرى بۇعان دەيىن قاراقالپاقستان استاناسىندا، بۇحارا جانە سامارقان قالالارىندا بولدى. ەندى ەكسپەديتسيا قىرعىزستاندا جالعاسادى. ونىڭ قورىتىندىسى بويىنشا الماتىدا كورمە اشىلادى.