وزبەكستاندا بيزنەسپەن اينالىسقان 400 گە جۋىق مەملەكەتتىك قىزمەتشى انىقتالدى
تاشكەنت. KAZINFORM - وزبەكستاندا مەملەكەتتىك قىزمەتتە ءجۇرىپ، كاسىپكەرلىك سۋبەكتىلەرىنە يەلىك ەتكەن مينيسترلىكتەردىڭ 398 مامانى انىقتالدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
قۇرىلىس جانە تۇرعىن ءۇي-كوممۋنالدىق شارۋاشىلىعى، سۋ شارۋاشىلىعى مەن اۋىل شارۋاشىلىعى مينيسترلىكتەرىنىڭ باسشىلىق لاۋازىمداعى 398 قىزمەتكەرى 449 كاسىپكەرلىك سۋبەكتىسىنىڭ قۇرىلتايشىسى بولعانى انىقتالدى.
وزبەكستاننىڭ سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، قۇرىلىس جانە تۇرعىن ءۇي كوممۋنالدىق شارۋاشىلىعى مينيسترلىگىندە 93 قىزمەتكەر 112 كومپانيانىڭ قۇرىلتايشىسى بولسا، سۋ شارۋاشىلىعى مينيسترلىگىندە 26 مامان 35 بيزنەسكە يەلىك ەتكەن. بۇعان قوسا، اۋىل شارۋاشىلىعى مينيسترلىگىنىڭ 279 ەڭبەككەرى 302 كومپانيانىڭ باسشىسى ەكەنى انىقتالدى.
اگەنتتىك اتالعان مينيسترلىكتەرگە ءتيىستى ۇسىنىس جولداپ، ناتيجەسىندە زاڭ بۇزۋشىلىقتار جويىلدى.
اۆتور
ءاليحان اسقار ۇلى