وزبەكستاندا بالالاردى ءدىني تاربيە الۋعا زاڭسىز تارتقاندارعا ايىپپۇل سالىنادى

 استانا. KAZINFORM - اتا- انالارعا بالاسىن تىركەلمەگەن ءدىني ۇيىمدارعا نەمەسە ءتيىستى ءبىلىمى جوق ادامدارعا وقۋعا جىبەرۋگە تىيىم سالاتىن زاڭ جوباسى ءبىرىنشى وقىلىمدا قابىلداندى، دەپ حابارلايدى UzNews.

ولي ءماجليستىڭ زاڭ شىعارۋشى پالاتاسىنىڭ وتىرىسىندا «كەيبىر زاڭنامالىق اكتىلەرگە بالالاردىڭ قۇقىعىن ودان ءارى نىعايتۋ ماقساتىندا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قابىلداندى.

زاڭ جوباسى اكىمشىلىك جاۋاپكەرشىلىك تۋرالى كودەكستىڭ 47-بابىن اتا- انالاردىڭ نەمەسە ولاردى الماستىراتىن ادامداردىڭ بالانى ءدىني ءبىلىم بەرۋ پروتسەسىنە زاڭسىز تارتۋى ءۇشىن اكىمشىلىك جاۋاپكەرشىلىكتى بەلگىلەيتىن قوسىمشا بولىكتەرمەن تولىقتىرۋدى كوزدەيدى. وسىلايشا، بالانى ءدىني ءبىلىم بەرۋ ۇدەرىسىنە زاڭسىز تارتقان جاعدايدا، نەگىزگى ەسەپتىك سومانىڭ (ەڭ تومەنگى جالاقىنىڭ ورنىنا پايدالانىلعان) 10 نان 15 ەسەلەنگەن مولشەرىندە ايىپپۇل سالىنادى.

اكىمشىلىك جازا قولدانىلعاننان كەيىن بىر جىل ىشىندە ءدال سول قۇقىق بۇزۋشىلىق قايتالانسا، 15 تەن 25 كە دەيىنگى مولشەردە ايىپپۇل سالۋعا نەمەسە 15 تاۋلىككە دەيىن اكىمشىلىك قاماققا الۋعا اكەپ سوعادى.

سونىمەن قاتار اتا- انالاردىڭ نەمەسە ولاردى الماستىراتىن ادامداردىڭ زاڭدى بۇزا وتىرىپ بالانى ءدىني ءبىلىم بەرۋ ۇدەرىسىنە تارتۋىنا جول بەرىلمەيدى. ياعني، وزبەكستانداعى ءدىني ۇيىمداردىڭ ورتالىق باسقارۋ ورگانىنىڭ رۇقساتىنسىز بالانى تىركەۋدەن وتپەگەن نەمەسە ليتسەنزياسى جوق ۇيىمدارعا، ارنايى ءدىني ءبىلىمى جوق جانە ءدىني ءبىلىم بەرەتىن تۇلعالارعا ءدىني ءبىلىم الۋعا بەرۋگە تىيىم سالىنادى.

«بۇل زاڭ جوباسىن قابىلداۋ بالالاردىڭ ءبىلىم بەرۋ سالاسىنداعى قۇقىعىن قورعاۋعا جانە ولاردىڭ ءدىني ەكسترەميزم، سەپاراتيزم جانە فاناتيزم يدەيالارىنىڭ قۇربانى بولۋىنا جول بەرمەۋگە قىزمەت ەتەدى»، - دەپ اتاپ ءوتتى دەپۋتاتتار.