وزبەكستاندا التىن قۇيمالار مەن مونەتالاردىڭ قۇنى رەكوردتىق دەڭگەيدە قىمباتتادى

تاشكەنت. KAZINFORM - بۇگىن وزبەكستان بانكتەرىندەگى التىن قۇيمالار مەن مونەتالاردىڭ باعاسى قىمباتتاپ، بۇعان دەيىن تىركەلگەن تاريحي كورسەتكىشتەن اسىپ ءتۇستى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

وزبەكستان ورتالىق بانكىنىڭ دەرەگىنە ساي، قازىر ءبىر گرامم التىن 915 مىڭ سۋمعا (32567 تەڭگە) باعالانىپ وتىر. بۇل 26-ناۋرىزداعى قۇنعا قاراعاندا %0,9 عا قىمبات. ال سالماعى 5 گرامم بولاتىن التىن قۇيمانىڭ باعاسى 4,575 ميلليون سۋمعا (162 مىڭ تەڭگە) تەڭ.

الايدا، قىمبات مەتالدىڭ الەمدىك نارىقتاعى قۇنى وتكەن اپتامەن سالىستىرعاندا ءبىرشاما ارزاندادى. 20-ناۋرىزدا التىننىڭ ۋنتسياسى (31,1 گرامم) 2200 دوللار بولسا، بۇگىندە ول 2180 دوللاردىڭ شاماسىندا.

ايتا كەتەيىك، اتالعان قىمبات مەتالدىڭ باعاسى ناۋرىز ايىنىڭ باسىندا بىرنەشە رەت رەكوردتىق كورسەتكىشكە جەتكەن بولاتىن. اتاپ ايتقاندا، ءبىر اپتا ىشىندە 5 گرامم التىن قۇيماسى بىردەن 200 مىڭ سۋمعا (7153 تەڭگە) قىمباتتادى، ال 12-ناۋرىزدا ونىڭ قۇنى العاش رەت 4,5 ميلليون سۋمعا (160 مىڭ تەڭگە) جەتتى.