وزبەكستاندا اباي كۇنى كەڭ كولەمدە اتاپ وتىلەدى

وزبەكستان ۇكىمەتى ابايدىڭ 180 جىلدىعىن اتاپ ءوتۋ باعدارلاماسىنا 152 ميلليون سۋم قارجى ءبولدى، دەپ حابارلايدى turkystan.kz 24KZ-كە سىلتەمە جاساپ.

اتالعان سوما مادەني ءىس-شارالاردى ۇيىمداستىرۋعا، قالا مەن اۋدان، اۋىلداردا وتەتىن جىر ءمۇشايرالارىنىڭ جۇلدەگەرلەرىنە باعالى سىيلىق الۋعا جۇمسالماق. وزبەكستان جازۋشىلار وداعىندا وتكەن جيىندا قازاقتىڭ ۇلى اقىنى جايلى عىلىمي جۇمىستار تانىستىرىلىپ، وزبەك تىلىنە اۋدارىلعان اباي شىعارمالارىنا تالداۋ جاسالدى. 

ەسكە سالا كەتەيىك، 2018 -جىلى وزبەكستان پرەزيدەنتىنىڭ قاۋلىسىمەن ەلدە اباي كۇنىن اتاپ ءوتۋ باعدارلاماسى بەكىتىلگەن. جىل سايىن 10-تامىزدا تاشكەنتتەگى ۇلى اقىننىڭ ەسكەرتكىشىنە گۇل شوعىن قويۋ سالتاناتتى شاراسى ۇيىمداستىرىلىپ، ەكى ەل عالىمدارىنىڭ قاتىسۋىمەن عىلىمي- پراكتيكالىق كونفەرەنتسيا وتكىزۋ داستۇرگە اينالعان.

«ۇلى ابايدىڭ 180 جىلدىعىن اتاپ ءوتىپ جاتىرمىز. 9-تامىز كۇنى حالىقارالىق كونفەرەنسيا وتەدى. كەشقۇرىم كونسەرت. ۇلكەن توي جاسايمىز. وبلىستاردا كوكپارلار، مەكتەپتەردە، جوعارعى وقۋ ورىندارىنىڭ اراسىندا ءمۇشايرالار ءوتىپ جاتىر»، - وزبەكستانداعى قازاق مادەني ورتالىعىنىڭ توراعاسى سەرىكباي ۇسەنوۆ.