وزبەكستاندا 9 بالاباقشانىڭ 70 تەن استام بالاسى ۋلانىپ، اۋرۋحاناعا ءتۇستى
وزبەكستاننىڭ نامانگان وبلىسىنداعى چۋست اۋدانىندا 9 بالاباقشانىڭ 70 تەن استام بالاسى مەن 2 وقۋشى ۋلانىپ، اۋرۋحاناعا ءتۇستى.
ولاردىڭ ناقتى نەدەن ۋلانعانى ازىرگە بەيمالىم. الەۋمەتتىك جەلىدە ۋلانۋ سەبەبى يود پرەپاراتىنان بولۋى مۇمكىن دەگەن بولجامدار ايتىلىپ جاتىر، دەپ حابارلايدى قازاقپارات Gazeta.uz باسىلىمىنا سىلتەمە جاساپ.
بالالاردىڭ جاپپاي ۋلانۋى تۋرالى ەڭ الدىمەن الەۋمەتتىك جەلى قولدانۋشىلارى حابارلادى. اتا- انالار بالالارىنا يود پرەپاراتى بەرىلگەنىن ايتادى (وسى اپتادا وزبەكستاندا بالالاردى يودتاۋ بويىنشا اپتالىق باعدارلاما باستالعان).
Namanganliklar.uz Telegram ارناسىندا جاريالانعان وبلىستىق دەنساۋلىق ساقتاۋ باسقارماسىنىڭ مالىمەتىنشە، 21-قىركۇيەك كۇنى ساعات 16:00 دەن باستاپ اۋداندىق مەديتسينا بىرلەستىگىنە 71 بالا تۇسكەن.
ولاردىڭ دەنە قىزۋى كوتەرىلىپ، كەيبىرىنىڭ ءىشى اۋىرعان، ديارەيا بولىپ، قۇسىپ جاتقاندارى دا بار.
اكىمشىلىك جەدەل جۇمىس توبىن قۇرىپ، زەرتتەۋ جۇمىستارىن باستادى. جاعدايى ءتاۋىر 9 بالا ۇيىنە جىبەرىلدى. قالعان بالالار باقىلاۋدا.
اۋرۋدىڭ ناقتى سەبەبى ازىرگە انىقتالمادى.
22 قىركۇيەك كۇنى تاڭەرتەڭ وزبەكستان دەنساۋلىق ساقتاۋ مينيسترلىگى چۋستتاعى بالالاردىڭ جاپپاي ۋلانعانىن راستايتىن مالىمدەمە تاراتتى، ءبىراق ونىڭ ىقتيمال سەبەپتەرى مەن زارداپ شەككەندەر سانىن ناقتىلامادى.
«بۇكىل بالا بەلگىلەنگەن ستاندارت بويىنشا ەمدەلىپ جاتىر. قورىتىندى دياگنوزدى قويۋ ءۇشىن سىناما الىنىپ، تالاپقا ساي زەرتتەلەدى» دەلىنگەن حابارلامادا.
جاعدايدى دەنساۋلىق ساقتاۋ ءمينيسترى باقىلاۋعا الدى.
10 بالا ۇيىنە جىبەرىلگەن. مينيسترلىك قوسىمشا اقپارات بەرۋگە ۋادە بەرىپ وتىر.
تۇندە باس پروكۋراتۋرانىڭ باسپا ءسوز قىزمەتى ۋلانۋ فاكتىسى بويىنشا تەرگەۋ ءجۇرىپ جاتقانىن حابارلادى. جاعداي پروكۋراتۋرانىڭ باقىلاۋىنا الىنعان.
«كامەلەتكە تولماعانداردىڭ نەدەن ۋلانعانى ازىرگە بەلگىسىز بولعاندىقتان جۇرتشىلىقتان جالعان اقپارات تاراتپاۋدى سۇرايمىز» دەلىنگەن حابارلامادا.
باس پروكۋراتۋرا الەۋمەتتىك جەلىلەردە چۋستتا توتەنشە جاعداي ەنگىزىلدى دەگەن اقپاراتتى جوققا شىعاردى.