وزبەكستان سەناتى قازاقستانمەن وداقتاستىق قاتىناس تۋرالى شارتتى راتيفيكاتسيالادى
وزبەكستان ولي ءماجىلىسىنىڭ سەناتى قازاقستانمەن وداقتاستىق قاتىناس تۋرالى شارتتى راتيفيكاتسيالايتىن زاڭدى ماقۇلدادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان سەناتىنىڭ باسپا ءسوز قىزمەتى تاراتقان اقپاراتقا ساي، 25 -قاراشادا وتكەن كەزەكتى جالپى وتىرىس شەڭبەرىندە «وزبەكستان رەسپۋبليكاسى مەن قازاقستان رەسپۋبليكاسى اراسىنداعى وداقتاستىق قاتىناستار جونىندەگى شارتتى راتيفيكاتسيالاۋ» تۋرالى زاڭ قارالعان.
تالقىلاۋ بارىسىندا سەناتورلار وزبەكستان مەن قازاقستاننىڭ جاقىن كورشىلەر ەكەنىن جانە ۇزاق ۋاقىت بويى ستراتەگيالىق ارىپتەس بولىپ كەلە جاتقانىن اتاپ ءوتتى.
سوڭعى جىلدارى ەكى ەل اراسىنداعى ىنتىماقتاستىقتىڭ جاڭا ءداۋىرى باستالدى.
اتاپ ايتقاندا، ساياسي، ساۋدا-ەكونوميكالىق، مادەني- گۋمانيتارلىق جانە باسقا سالالارداعى بايلانىس قارقىندى دامىپ كەلەدى.
ماقۇلدانعان شارت سىرتقى ساياسات، قورعانىس جانە قاۋىپسىزدىك، كوشى-قون، ونەركاسىپتىك كووپەراتسيانى دامىتۋ، ترانسشەكارالىق سۋ رەسۋرستارىن ۇتىمدى پايدالانۋ جونىندە بىرلەسكەن شارالار قابىلداۋ، پارلامەنتتەر، ساياسي پارتيالار مەن قوعامدىق ۇيىمدار اراسىنداعى بايلانىستاردى نىعايتۋعا باعىتتالعان ءوزارا ءىس-قيمىلدار كەشەنىن قامتيدى.
«شارتتى راتيفيكاتسيالاۋ ەكى حالىقتىڭ رۋحاني جانە مادەني جاقىندىعىن نىعايتۋعا، مادەنيەت، عىلىم، ءبىلىم جانە سپورت سالاسىنداعى ءوزارا قارىم- قاتىناستاردى ىلگەرىلەتۋگە قىزمەت ەتەدى»، - دەلىنگەن سەناتتىڭ باسپا ءسوز قىزمەتى تاراتقان حابارلامادا.
ەسكە سالايىق، قاسىم-جومارت توقايەۆ پەن شاۆكات ميرزيياەۆ وداقتاستىق قاتىناستار تۋرالى شارتقا بىلتىر 22-جەلتوقساندا تاشكەنتتە قول قويعان بولاتىن.