وزبەكستان رەسەيدەن گاز يمپورتىن ارتتىرۋ ءۇشىن 500 ميلليون دوللار جۇمسايدى
تاشكەنت. KAZINFORM - وزبەكستان ۇكىمەتى رەسەيدەن گاز تاسىمالداۋ جۇيەسىن جاڭعىرتۋعا 500 ميلليون دوللار ءبولۋدى جوسپارلاپ وتىر. ماقسات - تابيعي گاز يمپوتىن 9 ميلليون تەكشە مەتردەن 32 ميلليون تەكشە مەترگە جەتكىزۋ.
«ۋزترانسگاز» سولتۇستىكتەن اكەلىنەتىن تابيعي گاز كولەمىن ۇلعايتۋ ءۇشىن ماگيسترالدىق گاز جۇيەسىن جاڭعىرتۋ باعدارلاماسىن جۇزەگە اسىرۋدا. بۇل ۇكىمەتتىڭ «2024-جىلدىڭ ءبىرىنشى توقسانىنا ارنالعان ينۆەستيتسيالىق باعدارلامانى ىسكە اسىرۋ جونىندەگى شارالار تۋرالى» قاۋلىسىندا قاراستىرىلعان.
2024-2030-جىلدارداعى ءبىرىنشى كەزەڭدە تابيعي گاز تاسىمالىن تاۋلىگىنە 32 ميلليون تەكشە مەترگە دەيىن جەتكىزۋ جوسپارلانىپ وتىرعانى اتاپ ءوتىلدى. جوبانى قارجىلاندىرۋدى شەتەلدىك نەسيەلەر ەسەبىنەن جۇزەگە اسىرۋ كوزدەلگەن.
سونداي-اق، رەسپۋبليكانىڭ ماگيسترالدىق گاز تاسىمالداۋ جۇيەسىن جاڭعىرتۋ جانە تيىمدىلىگىن ارتتىرۋ (2021-2024 ج ج.) باعدارلاماسىن ىسكە اسىرۋ جالعاساتىن بولادى. جالپى قۇنى 483 ميلليون دوللاردى قۇرايتىن جوبادا 511 شاقىرىم ماگيسترالدىق گاز قۇبىرى مەن 10 گاز ناسوس اگرەگاتىن جاڭعىرتۋ كوزدەلگەن.
اقپارات ءۇشىن، 2023-جىل 7- قازاندا قازاقستان، وزبەكستان جانە رەسەي پرەزيدەنتتەرى ماسكەۋدە وتكەن شارادا رەسەي گازىن قازاقستان ارقىلى وزبەكستانعا جەتكىزۋ پروتسەسىن باستاپ بەردى. وسى ماقساتتا 1960-جىلدارى تۇركىمەنستان مەن وزبەكستاننان رەسەيگە گاز تاسىمالداۋ ءۇشىن سالىنعان «ورتالىق ازيا-ورتالىق» ماگيسترالدىق جەلىسى كەرى جۇمىس ىستەۋگە بەيىمدەلدى.
«UzGasTrade» جانە «گازپروم ەكسپورت» اراسىنداعى كوممەرتسيالىق كەلىسىمشارت 2 جىل مەرزىمگە جاسالعان جانە تاۋلىگىنە 9 ميلليون تەكشە مەتر تابيعي گاز جانە جىلىنا شامامەن 2 ميلليارد 800 ميلليون تەكشە مەتر تابيعي گاز ساتىپ الۋدى كوزدەيدى.
ماسكەۋدە وتكەن شارادا رەسەي گازىن قازاقستان ارقىلى وزبەكستانعا جەتكىزۋ پروتسەسىن باستاپ بەردى.