وزبەكستان قازاقستاننىڭ مەملەكەتتىك ورگانداردىڭ تيىمدىلىگىن باعالاۋ جۇيەسىنە قىزىعۋشىلىق تانىتتى
استانا. KAZINFORM - بۇگىن مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي وزبەكستان رەسپۋبليكاسىنىڭ پرەزيدەنتى جانىنداعى ستراتەگيالىق رەفورمالار اگەنتتىگىنىڭ ديرەكتورى باحودير راحماتوۆپەن كەزدەستى.
كەزدەسۋ بارىسىندا مەملەكەتتىك قىزمەت سالاسىن دامىتۋ بويىنشا تاجىريبە الماسۋدىڭ ماڭىزدىلىعى تالقىلانىپ، قازاقستاننىڭ مەملەكەتتىك قىزمەت سالاسىنداعى تاجىريبەسى وزبەكستاننىڭ وسى سالاعا جاۋاپتى ۋاكىلەتتى مەملەكەتتىك ورگانىن قۇرۋ جانە زاڭنامالىق اكتىلەردى قابىلداۋ كەزىندە ءجىتى زەردەلەنگەنى اتاپ ءوتىلدى.
ايتا كەتۋ كەرەك، بيىلعى جىلدىڭ قىركۇيەك ايىندا وزبەكستاننىڭ مەملەكەتتىك قىزمەتتى دامىتۋ اگەنتتىگىنىڭ وكىلدەرى مەملەكەتتىك باسقارۋ اكادەمياسىندا مەملەكەتتىك قىزمەتتەگى اسسەسمەنت بويىنشا وقىتۋدان وتكەن بولاتىن.
دارحان جازىقباي وزبەك ارىپتەستەرىن مەملەكەت باسشىسىنىڭ «ادام مەملەكەت ءۇشىن ەمەس، مەملەكەت ادام ءۇشىن» قاعيداسى اياسىندا ىسكە اسىرىلىپ جاتقان مەملەكەتتىك قىزمەت جۇيەسىن جاڭعىرتۋ شارالارىمەن تانىستىردى. ول مەملەكەتتىك اپپاراتتا سەرۆيستىك جانە ادامعا باعدارلانۋ قاعيداتتارىن ىلگەرىلەتۋ، مەملەكەتتىك قىزمەتتىڭ گيبريدتىك مودەلىن قالىپتاستىرۋ، قىزمەتشىلەردى كاسىبيلەندىرۋ جۇمىستارىنا توقتالدى.
وزبەكستان تاراپى ەلىمىزدە مەملەكەتتىك قىزمەتتى دامىتۋدىڭ 2024-2029-جىلدارعا ارنالعان تۇجىرىمداماسىنا، مەملەكەتتىك ورگانداردىڭ تيىمدىلىگىن باعالاۋ جۇيەسىنە، مەملەكەتتىك قىزمەتشىلەردىڭ يكەمدى جۇمىس كەستەسىنە قىزىعۋشىلىق تانىتىپ، تاجىريبە الماسۋعا دايىن ەكەندىگىن ءبىلدىردى.
«م ق ءى ا ءتوراعاسى مەملەكەتتىك كىزمەتكە كادرلاردى سيفرلىق فورماتتا ىرىكتەۋدى جۇزەگە اسىراتىن «eQyzmet» جۇيەسىنىڭ مۇمكىندىكتەرى جانە مەملەكەتتىك قىزمەتشىلەردىڭ بىلىكتىلىگىن ۇزدىكسىز ارتتىرۋ شارالارى تۋرالى ايتتى. كەزدەسۋ سوڭىندا تاراپتار الداعى ۋاقىتتا تىعىز بايلانىستا جۇمىستار اتقارۋعا نيەتتى ەكەندىكتەرىن ءبىلدىردى»، - دەپ اتاپ وتەدى اگەنتتىكتىڭ باسپا ءسوز قىزمەتىنەن.