بىلتىر وزبەكستان مەن قىتايدىڭ سىرتقى ىستەر مينيسترلەرى ازاماتتارعا 30 كۇن ىشىندە ۆيزاسىز قوس ەلگە بارۋعا مۇمكىندىك بەرەتىن كەلىسىمگە قول قويعان بولاتىن.
وسى ورايدا، ب ا ق وكىلدەرىنىڭ قاتىسۋىمەن وتكەن باسپا ءسوز ءماسليحاتىندا Uzbekistan Airways كومپانياسى ءتوراعاسىنىڭ ورىنباسارى شۋحرات يادگاروۆ اتالعان قۇجاتتىڭ ناقتى قاشان كۇشىنە ەنەتىنىن ايتتى.
- ناۋرىز ايىنان كەيىن ەلدەرىمىز اراسىندا ۆيزاسىز رەجيم تۋرالى كەلىسىم كۇشىنە ەنۋى مۇمكىن. تيىسىنشە، جولاۋشىلار سانى 10 ەسە ارتادى. سوندىقتان مۇمكىندىكتى ءتيىمدى پايدالانىپ، بارلىق تالاپقا ساي رەيستەر ۇيىمداستىرۋدى جوسپارلاپ وتىرمىز، - دەدى شۋحرات يادگاروۆ.
بۇل رەتتە اۋەكومپانيا تاشكەنتتەن شىنجىنگە جانە فەرعانادان ۇرىمجىگە جاڭا رەيستەر اشۋدى جوسپارلاپ وتىر.
ەسكە سالايىق، Uzbekistan Airways كومپانياسىنىڭ ۇشاقتارى 20 -قاڭتاردان بەرى رەسەيدى اينالىپ ءوتىپ، ەۋروپاعا رەيس ورىنداپ جاتىر.
توقتالا كەتەيىك، قازاقستان مەن قىتاي اراسىندا ۆيزاسىز رەجيم 2023 -جىلى 10 -قاراشادا ورنادى. وعان ساي، قازاقستان ازاماتتارى قىتاي اۋماعىندا، قىتاي ازاماتتارى قازاقستاندا 30 كۇننەن اسپايتىن ۋاقىت ارالىعىندا ۆيزاسىز جۇرە الادى.
اۆتور
ءاليحان اسقار