وزبەكستان ۇكىمەتى جۇمىسسىزدىق ماسەلەسىن قالاي شەشپەك

بيىل وزبەكستان ۇكىمەتى 5 ميلليون ادامدى جۇمىسپەن قامتۋدى جوسپارلاپ وتىر. بۇل تۋرالى پرەزيدەنت شاۆكات ميرزيەۆتىڭ قاتىسۋىمەن وتكەن حالىقتى جۇمىسپەن قامتۋ ماسەلەلەرى تۋرالى كەڭەستە ايتىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

جيىن بارىسىندا سالاعا جاۋاپتى لاۋازىمدى تۇلعالار بيىل جاڭا جۇمىس ورىندارىن قۇرۋعا ارنالعان جوسپارلاردى جاريالادى. بۇگىندە رەسمي ستاتيستيكاعا سايكەس، 1,3 ميلليون وزبەكستاندىق جۇمىسسىز. بۇعان قوسا بيىل ەڭبەككە قابىلەتتى جاسقا جەتكەن تاعى 2,4 ميلليون ادام نارىققا كىرەدى.

بۇل ماسەلەلەردى شەشۋ ماقساتىندا ارنايى باعدارلاما ازىرلەنگەن. وعان ساي، قىزمەت كورسەتۋ سالاسىندا - 2,5 ميلليون، اۋىل شارۋاشىلىعى باعىتىندا - 2,1 ميلليون، ينۆەستيتسيالىق جوبالار مەن ونەركاسىپتە - 250 مىڭ ال قۇرىلىستا 140 مىڭ ادامعا قىزمەت ۇسىنۋ مۇمكىندىگى بار. سونىمەن قاتار ميكروقارجىلاندىرۋ جۇيەسىن كەڭىنەن ەنگىزۋ ارقىلى بيزنەسكە 2 ميلليون ادامدى تارتۋ كوزدەلىپ وتىر.

بۇعان قوسا كەڭەستە كاسىپكەرلىك سالاسىنداعى مىندەتتى تالاپتاردى قىسقارتۋ جانە ليسەنزيالاۋ ءتارتىبىن جەڭىلدەتۋ ۇسىنىستارى دا قارالدى. وعان بايلانىستى وسى جىلدان باستاپ انىقتامالار مەن ەسەپ قۇجاتتارىنىڭ 34 ءتۇرى جويىلدى. تيىسىنشە، 21 مىڭنان استام كاسىپكەر جىل سايىن 500 ميلليون سۋم (18,3 ميلليون تەڭگە) ۇنەمدەي الادى.

اۆتور

ءاليحان اسقار