وزبەكستان بيىل 11 ميلليون شەتەلدىك تۋريستتى قابىلداماق

استانا. قازاقپارات - وزبەكستان تۋريزمدى دامىتۋ ءۇشىن ەلگە تانىمال شەتەلدىك بلوگەرلەردى تارتۋدى جوسپارلاپ وتىر، دەپ حابارلايدى 24kz.

بۇل ءىس ەلدىڭ ساياحات سالاسىنداعى الەۋەتىن دامىتۋعا سەپ بولماق. ونىڭ اياسىندا 1-قازانعا دەيىن تۋريستىك برەند جايلى كونتەنت جاساۋشىلاردىڭ اراسىندا كونكۋرس وتەدى. بۇل باعىتتاعى ىستەرگە بيىل 5 ميلليون دوللار قاراجات بولىنەدى.

كورشى ەلدىڭ تۋريزم سەكتورىنا ينۆەستيتسيا اعىنى دا ارتىپ كەلەدى. مەملەكەت ونىڭ كولەمىن 2 ميلليارد دوللارعا جەتكىزۋگە نيەتتى.

وزبەكستان پرەزيدەنتى شاۆكات ميرزيەۆتىڭ تاياۋداعى تاپسىرماسىنا ساي 10 ميلليوننان استام اۋديتورياسى بار 50 شەتەلدىك بلوگەر ەلگە شاقىرىلىپ، ولار ءۇشىن تۋر ۇيىمداستىرىلادى. بۇعان قوسا، مينيسترلىك جانە ءتيىستى ۆەدومستۆولارعا ەلەكتروندىق ۆيزا جۇيەسىن جەتىلدىرۋ، تۋريستەرگە ىڭعايلى موبيلدى قوسىمشالاردى ىسكە قوسۋ مىندەتتەلگەن.

جالپى تۋريزم يندۋسترياسى - وزبەكستان ەكونوميكاسىنىڭ ەڭ جىلدام دامىپ كەلە جاتقان ءارى كەلەشەگى زور سالالاردىڭ ءبىرى. ەلدەگى تۋريزم كوميتەتىنىڭ مالىمەتىنشە، پاندەميادان كەيىن تۋريستىك اعىننىڭ جىلدىق ءوسىمى - تەن اسىپ وتىر. بىلتىر بۇل ەلگە 6 ميلليوننان استام شەتەلدىك ساياحاتشى كەلىپ، تۋريستىك قىزمەتتەردىڭ ەكسپورتى 2 ميلليارد دوللارعا جەتكەن. «سونىڭ ىشىندە قازاقستاندىق ساياحاتشىلاردىڭ قاراسى قالىڭ»، - دەيدى ماماندار.

ۋميد شاديەۆ، وزبەكستان تۋريزم كوميتەتىنىڭ ءتوراعاسى:

- قازاقستاننان بىزگە كوپ ساياحاتشى كەلەدى. جالپى ەكونوميكالىق ىنتىماقتاستىق ۇيىمى مەملەكەتتەرىنىڭ نارقى ءبىز ءۇشىن وتە ماڭىزدى. بىلتىر سول ەلدەردەن وزبەكستانعا 5,5 ميلليون تۋريست ايالدادى. ونىڭ باسىم بولىگى قازاقستان، قىرعىزستان جانە تاجىكستاننان. كورسەتكىشتى ءالى دە ارتتىرعىمىز كەلەدى. ماسەلەن، تەك تاشكەنت، سامارقان، بۇحارا ەمەس، شاحريسابزدى وسى باعىتتا دامىتۋعا كىرىستىك. تۋريستىك سالانى ءارتاراپتاندىرۋ ساياساتى وسىلاي جۇزەگە اسىپ جاتىر. كورشىمىز كونە قالالارى مەن ەجەلگى تاريحىن ۇقىپتى ساقتاپ، پايدا كوزىنە اينالدىرىپ كەلەدى. وعان قوسا، زاماناۋي ساياحات باعىتتارىن دامىتۋعا دەن قويعان.

قازاقستاندا دا ۇلتتىق پاركتەردىڭ تۋريستىك الەۋەتى ءبىرشاما ارتتى. 5 جىل بۇرىنعىمەن سالىستىرعاندا تۇمسا تابيعات اياسىنداعى ساياحاتتى تاڭدايتىندار سانى ۇلعايعان. ماسەلەن 2019 -جىلى ەلدەگى 14 ۇلتتىق پارككە 698 مىڭ ادام بارسا، 2020 -جىلى ولاردىڭ سانى 898 مىڭعا جەتكەن. اراعا ءبىر جىل سالىپ كەلىشۋلەر سانى 2 ميلليونعا تولدى. بىلتىر 2 ميلليون 400 مىڭنان استام تۋريست بارعان.

ال ەندى شەتەلدەن كەلگەن مەيمانداردىڭ سانىنا ۇڭىلسەك. پاندەمياعا دەيىن قازاقستانعا 8,5 ميلليون تۋريست كەلگەن. 2022 -جىلى 4 ميلليون 700 مىڭ ادام ەلدى ارالاسا، 2023 -جىلى كەلۋشى سانى پاندەمياعا دەيىنگى كورسەتكىشتەن اسىپ ءتۇستى. بيىل 10 ملن- نان استام شەتەلدىك مەيمان كەلەدى دەگەن بولجام بار. ەلىشىلىك تۋريزمنىڭ ستاتيستيكاسى دا جاقسارعان. 2019 -جىلى 6 ميلليون 700 مىڭ قازاقستاندىق ەل ءىشىن ارالاسا، بىلتىر ولاردىڭ سانى 9 ميلليون 600 مىڭنان اسىپ جىعىلدى. بولجام بويىنشا جىل سوڭىنا دەيىن 10,5 ميلليونعا جەتۋى مۇمكىن.

جالپى دۇنيەجۇزىلىك ەكونوميكالىق فورۋمنىڭ ساياحات جانە تۋريزم رەيتينگىسىندە بىلتىر قازاقستان 52-ورىنعا شىعىپتى. 2021 -جىلعىمەن سالىستىرعاندا ەلىمىز 66-ورىننان 14 پوزيتسياعا كوتەرىلگەن.