وڭىرلەردە نان باعاسى قانشا تۇرادى؟
قازاقستاندىقتاردىڭ داستارحانىن نانسىز ەلەستەتۋ مۇمكىن ەمەس. بۇگىندە ۇن ءونىمىنىڭ بۇل تۇرىنە تاڭداۋ مول. ازىق-تۇلىك سەبەتىنە قاراپايىم نان، ءدامى ءتاتتى توقاش، تاندىر نان سەكىلدى بىرنەشە ءتۇرىن قوسۋعا بولادى. Kazinform اگەنتتىگىنىڭ رەداكسياسى وڭىرلەردەگى دۇكەن سورەسىندە اس اتاسىنىڭ بۇل ءتۇرى نەشە تەڭگەگە ساتىلىپ جاتقانىن سارالاپ كوردى.
ەلىمىزدەگى باعاسى تومەن جانە جوعارى ناننىڭ قاي وڭىردە ساتىلاتىنىن انىقتاۋ ماقساتىندا ءبىرىنشى سۇرىپتى ۇننان جاسالعان ءونىم قۇنىن بىلدىك. ەڭ تومەن باعا تۇركىستاندا بولىپ شىقتى. مۇندا ءبىرىنشى سۇرىپتى نان 70 تەڭگەگە ساتىلىپ جاتىر. ال ەكىنشى ورىندا قىزىلوردا قالاسى تۇر. مۇندا ءبىر بولكە نان باعاسى 90 تەڭگە.
سودان كەيىن اقتاۋ قالاسى بار. مۇندا نان باعاسى 95 تەڭگە. ال شىمكەنتتە قالىپتا پىسكەن نان اسا قاتتى سۇرانىستا بولماسا دا 99 تەڭگە بولىپ تۇر.
ال وسكەمەن مەن اقتوبەدە نان باعاسى 100 تەڭگە تۇرادى.
سونىمەن بىرگە تاراز، قونايەۆ جانە جەزقازعان قالالارىندا نان باعاسى بىردەي. مۇندا اس اتاسىنىڭ ءبىر بولكەسى 110 تەڭگەدەن ساتىلىپ جاتىر. اتىراۋ قالاسىندا دا باعا شامالاس. مۇندا نان باعاسى 115 تەڭگە. الماتى مەن پاۆلودار قالالارىندا قازىرگى كەزدە نان ورتا ەسەپپەن 120 تەڭگەدەن ساتىلىپ جاتىر.
ودان ءارى قاراعاندى قالاسى تۇر. مۇندا تۇتىنۋشىلار نانعا 135 تەڭگە تولەپ ءجۇر. ال استىقتىڭ وتانى قوستانايدا باعا بۇدان 4 تەڭگەگە جوعارى. ياعني نان 139 تەڭگەگە ساتىلادى. سەمەيلىكتەر بولسا نان ساتىپ الۋ ءۇشىن 150 تەڭگە جۇمسايدى.
ودان كەيىن قالالار اراسىنداعى نان باعاسىندا 10 تەڭگە ايىرماشىلىق بار. پەتروپاۆلدا نان 160 تەڭگە تۇرادى. ال ەلىمىزدىڭ استاناسى استانا قالاسىندا باعا 170، تالدىقورعاندا 180 تەڭگە.
سوڭىنان باستاپ ساناعاندا ەكىنشى ورىندا ورال قالاسى تۇر. مۇندا ناننىڭ قۇنى - 200 تەڭگە. بۇل ەلىمىزدەگى ەڭ قىمبات نان ەمەس. قازاقستان بويىنشا ەڭ جوعارى باعا ءقازىر كوكشەتاۋ قالاسىندا بولىپ تۇر. مۇندا باعا 205 تەڭگە.
قازاقستاندىقتاردىڭ ءبارى بىردەي قالىپتا پىسكەن نان جەمەيدى. ماسەلەن شىمكەنت پەن تۇركىستان حالقى تاندىر نان تۇتىنعاندى ءجون كورەدى. ال كەيبىرى ءتاتتى توقاش ساتىپ الادى. ونىڭ باعاسى ءبىرىنشى سۇرىپتى نانعا قاراعاندا الدەقايدا جوعارى.
قازاقستانداعى كەيبىر سۋپەرماركەتتەر جەلىسىنەن قاجەتتى ناندى تاپپايتىن كەزدەر دە كەزدەسەدى. سورەلەردە نان ونىمدەرى بولعانىمەن، قاراپايىم عانا قالىپقا پىسكەنىن تاپپاي، ادامدار ءۇي ماڭىنداعى شاعىن دۇكەندەرگە جۇگىرەدى.
اۆتور
التىناي ساعىندىقوۆا