عالىمداردىڭ مالىمەتىنشە، جاس ۇلعايعان سايىن ادامنىڭ جادى، زەيىنى مەن تىلدىك قابىلەتتەرى بىرتىندەپ السىرەيدى. كەيبىر ادامداردا بۇل وزگەرىستەر جەڭىل كوگنيتيۆتىك بۇزىلىسقا ۇلاسۋى مۇمكىن. بۇل جاعداي كۇندەلىكتى ومىرگە ايتارلىقتاي كەدەرگى كەلتىرمەگەنىمەن، بولاشاقتا التسگەيمەر اۋرۋى مەن دەمەنتسيانىڭ دامۋ قاۋپىن ارتتىرادى.
ءدال وسى سەبەپتى زەرتتەۋشىلەر ءدارى-دارمەكسىز مي ساۋلىعىن ساقتاۋدىڭ ءتيىمدى تاسىلدەرىن ىزدەۋدە. سولاردىڭ ءبىرى - ميدى تۇراقتى تۇردە جاتتىقتىرۋ. عالىمدار مۇنداي بەلسەندىلىك جۇيكە جاسۋشالارى اراسىنداعى بايلانىستى نىعايتىپ، جاسقا بايلانىستى وزگەرىستەرگە توزىمدىلىكتى ارتتىرادى دەپ ەسەپتەيدى.
زەرتتەۋ اياسىندا ا ق ش-تاعى دجوردج مەيسون ۋنيۆەرسيتەتىنىڭ عالىمدارى StrongerMemory باعدارلاماسىنىڭ تيىمدىلىگىن باعالادى. وعان جاسى 59-دان اسقان 102 ادام قاتىستى. ولاردىڭ بارلىعى ەستە ساقتاۋ قابىلەتىنىڭ ناشارلاعانىن ايتقانىمەن، ەشقايسىسىنا دەمەنتسيا دياگنوزى قويىلماعان.
قاتىسۋشىلارعا كۇن سايىن ءۇش تاپسىرمانى ورىنداۋ ۇسىنىلدى:
10 مينۋت بويى داۋىستاپ كىتاپ وقۋ؛
10 مينۋت قولمەن جازۋ؛
10 مينۋت قاراپايىم ماتەماتيكالىق ەسەپتەر شىعارۋ.
ولار وزدەرى وقيتىن كىتاپتى جانە جازاتىن تاقىرىپتى ەركىن تاڭدادى.
زەرتتەۋشىلەردىڭ ايتۋىنشا، داۋىستاپ وقۋ ءۇنسىز وقۋعا قاراعاندا كورۋ مەن ەستۋ جۇيەسىن قاتار ىسكە قوسىپ، زەيىندى كوبىرەك تالاپ ەتەدى. قولمەن جازۋ ۇساق موتوريكانى دامىتىپ، اقپاراتتى ەستە ساقتاۋعا كومەكتەسەدى. ال قاراپايىم ماتەماتيكالىق ەسەپتەر لوگيكالىق ويلاۋدى جانە نازاردى شوعىرلاندىرۋدى ىنتالاندىرادى، ءبىراق قاتىسۋشىلارعا ارتىق كۇيزەلىس تۋعىزبايدى.
12 اپتادان كەيىن جۇرگىزىلگەن باعالاۋ ناتيجەلەرى قاتىسۋشىلاردىڭ كوگنيتيۆتىك تەستىلەردەگى كورسەتكىشتەرى جاقسارعانىن كورسەتتى. دەگەنمەن زەرتتەۋ اۆتورلارى بۇل وزگەرىستەردىڭ كولەمى اسا ۇلكەن بولماعانىن جانە قىسقا تەست ناتيجەلەرىنىڭ جاقسارۋى ادامنىڭ كۇندەلىكتى ومىردەگى بارلىق قابىلەتتەرى بىردەن جاقساردى دەگەندى بىلدىرمەيتىنىن اتاپ ءوتتى.
سوعان قاراماستان، ماماندار بۇل ءادىستىڭ قاراپايىم، قولجەتىمدى ءارى شىعىنى از ەكەنىن ايتادى. سونىمەن قاتار ءار ادام وقۋ ماتەريالىن جانە جازۋ تاقىرىبىن ءوز قىزىعۋشىلىعىنا قاراي تاڭداي الاتىندىقتان، مۇنداي جاتتىعۋدى ۇزاق ۋاقىت بويى تۇراقتى ورىنداۋ جەڭىل بولادى.
عالىمدار الداعى ۋاقىتتا تاپسىرمالاردىڭ كۇردەلىلىك دەڭگەيىن وزگەرتۋ ميدىڭ بەيىمدەلۋ قابىلەتىن ودان ءارى جاقسارتا الا ما دەگەن سۇراققا جاۋاپ ىزدەۋدى جوسپارلاپ وتىر.