وڭتۇستىكتەگى جەر سىلكىنىسىنىڭ ءدۇمپۋى استانادا نەگە سەزىلدى - مينيستر جاۋابى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك وڭتۇستىكتەگى جەر سىلكىنىسىنىڭ ءدۇمپۋى استانادا نەگە سەزىلگەنىن ايتتى.

«وڭتۇستىكتەگى جەر سىلكىنىسىنىڭ ءدۇمپۋى نەگە استانادا سەزىلدى؟» دەپ سۇرادى جۋرناليست ەكولوگيا جانە تابيعي رەسۋرستار مينيسترىنەن.

الايدا بۇل سۇراققا عىلىم جانە جوعارى ءبىلىم ءمينيسترى ساياسات نۇربەك جاۋاپ بەردى.

«افتەرشوكتار، سەيسميكالىق تولقىن ايتارلىقتاي ۇلكەن بولدى. ريحتەر شكالاسى بويىنشا 6,5-7 ءدۇمپۋ كۇشىنە جەتتى. سوندىقتان جەر سىلكىنىسىن ورتالىق ازيا دا سەزدى. تەربەلىستەر وڭتۇستىكتەن سولتۇستىككە باعىتتالدى. سوندىقتان استانا تۇرعىندارى دا ءدۇمپۋدى سەزىندى. ءبىراق مۇنداعى تەربەلىس شىن مانىندە وتە ءالسىز بولدى»، - دەدى ساياسات نۇربەك.

ب ا ق وكىلى بۇعان دەيىن الماتىدا سەزىلگەن ءزىلزالانىڭ اسەرى قاراعاندىعا عانا جەتكەنىن ايتا كەلىپ، بۇل جولى استاناعا دەيىن سەزىلۋىنىڭ سەبەبىن جەر استىنداعى وزگەرىستەرمەن بايلانىستىرۋ قانشالىقتى قيسىندى ەكەنىن سۇرادى.

«ونى ايتۋ قيىن. ءبىراق جەر استىنداعى وزگەرىستەردەن ەمەس. استانا تۇران دەپ اتالاتىن پلاتفورمادا تۇر. ول - وتە ورنىقتى، كونە پلاتفورما. سوندىقتان تەك افتەرشوك قانا سەزىلدى. ايتپەسە جەر سىلكىنىسىنىڭ ءوزى قۋاتتى بولدى. جالپى ۋايىمدايتىن ەشتەڭە جوق»، - دەدى مينيستر.

اۆتور
ەسىمجان ناقتىباي