جاڭالىق Zoosystematics and Evolution جۋرنالىندا جاريالاندى. زەرتتەۋ وڭتۇستىك قىتايداعى حۋاپين ۇلتتىق تابيعي قورىعى اۋماعىنداعى بيوالۋانتۇرلىلىكتى زەرتتەۋ اياسىندا جۇرگىزىلگەن. جوباعا گۋانسي تابيعات تاريحى مۋزەيى عالىمدارى دا قاتىسقان.
ۇزىندىعى 20 سانتيمەتردەن ءسال اساتىن جىلاننىڭ دەنەسى جىڭىشكە ءارى قوڭىرقاي ءتۇستى. عالىمداردىڭ ايتۋىنشا، ونىڭ ارقاسىندا جەتى ۇزىك قارا جولاق بار، ال قابىرشاقتارىنىڭ شەتتەرىندەگى قارا پيگمەنت تور ءتارىزدى ەرەكشە ورنەك قالىپتاستىرادى.
بۇل جىلان نەگىزىنەن تۇنگى ۋاقىتتا جانە جەر استىنا جاقىن ورتادا تىرشىلىك ەتەدى. ول كوبىنە جاپىراقتاردىڭ اراسىندا، شىرىگەن توپىراقتا جانە جارتاس ساڭىلاۋلارىندا جاسىرىنىپ جۇرەدى. زەرتتەۋشىلەر ونى تەڭىز دەڭگەيىنەن شامامەن 760 مەتر بيىكتىكتەگى جالپاق جاپىراقتى ورمانداردان تاپقان. جىلان جاۋىنقۇرتتارىمەن جانە جۇمساق دەنەلى جاندىك دەرناسىلدەرىمەن قورەكتەنەدى.
ماماندار بۇل جىلاندى ۋلى ەمەس، جۋاس ءارى ادامعا قاۋىپسىز دەپ سيپاتتادى. ونىڭ ەڭ ەرەكشە قورعانىس ءتاسىلى - قاۋىپ تونگەن كەزدە دەنەسىن سەگىز سانىنىڭ پىشىنىنە كەلتىرىپ بۇگىپ، دوعال قۇيرىعىن باسىنا ۇقساتىپ كورسەتۋى. وسى قاسيەتىنە بايلانىستى ول «ەكى باستى جىلان» دەگەن بەيرەسمي اتاۋعا يە بولعان.
بۇل - حۋاپين ۇلتتىق تابيعي قورىعى اۋماعىندا بيىل انىقتالعان ەكىنشى ماڭىزدى جاڭالىق. بۇعان دەيىن 2026 -جىلدىڭ باسىندا مۇندا Leptobrachella cathaya دەپ اتالاتىن جاڭا باقا ءتۇرى تابىلعان ەدى.
عالىمداردىڭ پىكىرىنشە، مۇنداي جاڭالىقتار قورىقتىڭ بيوالۋانتۇرلىلىكتى ساقتاۋداعى ماڭىزدى ءرولىن كورسەتەدى. سونداي-اق گۋانسيدىڭ سولتۇستىگىندەگى ەجەلگى ورماندار سيرەك كەزدەسەتىن تۇرلەردىڭ الەمدىك «گەنەتيكالىق قورى» رەتىندە ماڭىزىن ارتتىرىپ وتىر.
قازاقستاندا قازانعاپ اتىنداعى قىزىلوردا مۋزىكالىق جوعارى كوللەدجىنىڭ 4-كۋرس ستۋدەنتى نۇرسۇلتان يكراموۆ ءۇش جىلدان بەرى ۇيىندە جىلان اسىرايدى. ول Kazinform تىلشىسىنە بالا كۇنگى ارمانىنا قالاي قول جەتكىزگەنىن، جىلان اسىراۋدىڭ قيىندىعىن ايتىپ بەردى.