وڭتۇستىك كورەيانىڭ قورعانىس ءمينيسترى وتستاۆكاعا كەتەتىنىن مالىمدەدى

استانا. KAZINFORM - وڭتۇستىك كورەيانىڭ قورعانىس ءمينيسترى كيم ەن حەن وتستاۆكاعا كەتەتىنىن ايتتى. ول بۇل تۋرالى بۇگىنگى رەسمي ۇندەۋىندە مالىمدەدى.

قورعانىس ءمينيسترى ءوز مالىمدەمەسىندە تۋىنداعان تۇسىنبەۋشىلىك ءۇشىن وكىنەتىنىن جانە بارلىق اسكەري ارەكەت ونىڭ باسشىلىعىمەن ورىندالعانىن راستادى.

«توتەنشە اسكەري جاعدايعا بايلانىستى ازاماتتاردىڭ ابىرگە ءتۇسىپ، الاڭداپ قالعانى ءۇشىن قاتتى وكىنەمىن جانە جاۋاپكەرشىلىكتى سەزىنەمىن»، - دەدى ول.

باسىلىمنىڭ مالىمەتىنە قاراعاندا، وڭتۇستىك كورەيا قورعانىس ءمينيسترىنىڭ وتستاۆكا تۋرالى مالىمدەمەسى كورەيانىڭ دەموكراتيالىق پارتياسىنىڭ ەل پرەزيدەنتىنە يمپيچمەنت جاريالاعان تۇستا جاسالعان. يمپيچمەنت تۋرالى زاڭ جوباسىن ۇلتتىق جيىنعا ەنگىزۋ جوسپارلانىپ وتىر، داۋىس بەرۋ اپتانىڭ سوڭىنا دەيىن ءوتۋى كەرەك.

پرەزيدەنتتىڭ يمپيچمەنتى ماقۇلدانسا، كونستيتۋتسيالىق سوت التى اي ىشىندە شەشىم شىعارۋعا ءتيىس. وسى كەزەڭدە يۋن سوك ەل قىزمەتىنەن شەتتەتىلىپ، ەلدىڭ ۋاقىتشا كوشباسشىسى رەتىندە وڭتۇستىك كورەيانىڭ پرەمەر-ءمينيسترى حان دوك سۋ كەلەدى.

ەسكە سالايىق، بۇعان دەيىن سەۋلدە قاقتىعىستار باستالىپ، كوشەلەردە اسكەري تەحنيكا جۇرگەنى حابارلاندى.

كەيىنىرەك قازاقستاننىڭ كورەيا رەسپۋبليكاسىنداعى ەلشىلىگى قازاقستاندىقتارعا ۇندەۋ جاسادى.

ودان كەيىن وڭتۇستىك كورەيا پرەزيدەنتىنىڭ اپپاراتى وتستاۆكاعا كەتكەنى بەلگىلى بولدى.