وڭتۇستىك كورەيانىڭ ەكس-پرەزيدەنتى قاماۋدا قالا بەرەدى

استانا. قازاقپارات - 18-شىلدە كۇنى سوت وڭتۇستىك كورەيانىڭ بۇرىنعى پرەزيدەنتى يۋن سوك ەلدىڭ قاماۋدان بوساتۋ تۋرالى ءوتىنىشىن قاناعاتتاندىرمادى، دەپ حابارلايدى Yonhap.

وسىلايشا يۋن سوك ەل 2024-جىلدىڭ جەلتوقسانىندا اسكەري توتەنشە جاعداي ەنگىزۋگە تىرىسقانىنا بايلانىستى قوزعالعان ءىس اياسىندا قاماۋدا قالا بەرەدى.

سەۋلدىڭ ورتالىق وكرۋگتىك سوتى ەكس-پرەزيدەنت يۋن سوك ەلدىڭ قاماۋعا الىنۋىنىڭ زاڭدىلىعىنا قاتىستى تىڭداۋدان بىرنەشە ساعات وتكەن سوڭ شەشىم شىعاردى.

ەسكە سالايىق، يۋن سوك ەل 2024-جىلدىڭ جەلتوقسانىندا اسكەري توتەنشە جاعداي ەنگىزۋگە ارەكەت جاساعانى ءۇشىن قاماۋعا الىنعاننان كەيىن ءبىر اپتادان سوڭ بوساتىلۋعا ۇمتىلعان بولاتىن.

بۇعان دەيىن يۋن سوك ەلدىڭ قاماۋعا الىنۋىنىڭ زاڭدىلىعىنا قاتىستى سوت تىڭداۋى جۇما كۇنى جەرگىلىكتى ۋاقىتپەن 10:15 تە وتەتىنى حابارلانعان ەدى.