وڭتۇستىك كورەيانىڭ بۇرىنعى پرەزيدەنتى تاعى دا تۇتقىندالۋى مۇمكىن

استانا. KAZINFORM - ارنايى پروكۋرور چو ىن سوك كورەيا رەسپۋبليكاسىنىڭ ەكس- پرەزيدەنتى يۋن سوك ەلدى تۇتقىنداۋ ءۇشىن وردەر بەرۋدى سۇرادى، دەپ حابارلايدى رەسەيلىك ت ا س س.

Yonhap اگەنتتىگىنىڭ حابارلاۋىنشا، 25-ماۋسىم كۇنى سەۋلدىڭ ورتالىق اۋداندىق سوتى ارنايى پروكۋروردىڭ وردەر بەرۋ تۋرالى ءوتىنىشىن قاناعاتتاندىرمادى. ارنايى پروكۋرور سول سوتقا قايتا جۇگىنىپ، يۋن سوك ەلدى وكىلەتتىگىن اسىرا پايدالانۋ، قۇجاتتاردى قولدان جاساۋ، پرەزيدەنت تۋرالى زاڭدى بۇزۋ جانە بيلىك ورگاندارىنىڭ جۇمىسىنا كەدەرگى كەلتىرۋ باپتارى بويىنشا قاماۋعا الۋدى سۇرادى.

بۇل كۇدىكتەردىڭ بارلىعى 2024 -جىلدىڭ 3-جەلتوقسانىنداعى اسكەري جاعدايدىڭ جاريالانۋىمەن بايلانىستى. يۋن سوك ەل مەملەكەتتىك قۇرىلىمعا قارسى بۇلىك شىعارۋ بويىنشا قىلمىستىق باپ اياسىندا دا ايىپتالىپ وتىر.

Yonhap اگەنتتىگى اتاپ وتكەنىندەي، مەملەكەتتىك وپاسىزدىق كۇدىگى وردەر بەرۋ تۋرالى وتىنىشتە جوق. وڭتۇستىك كورەيادا مەملەكەتكە وپاسىزدىق جاسادى دەپ سىرتتان باسىپ كىرۋ ارەكەتى عانا تانىلادى.

2024 -جىلدىڭ جەلتوقسانىنان باستاپ وڭتۇستىك كورەيانىڭ ءبىرقاتار بۇقارالىق اقپارات قۇرالى يۋن سوك ەل اكىمشىلىگى ەلدە اسكەري جاعداي ەنگىزۋ ءۇشىن شەكارادا ك ح د ر- مەن جاعدايدى شيەلەنىستىرۋگە ارەكەت ەتتى، دەگەن بولجام جاريالاعان. ارنايى پروكۋروردىڭ وكىلى مەملەكەتكە وپاسىزدىق جاسادى دەگەن ايىپ بويىنشا ءىس ءالى دە قارالىپ جاتقانىن جەتكىزدى.

وسىعان دەيىن وڭتۇستىك كورەيانىڭ دەموگرافيالىق داعدارىس الدىندا تۇرعانى تۋرالى جازدىق.