وڭتۇستىك كورەيادا زاۋىتتا بولعان ءورت سالدارىنان 22 ادام قازا تاپتى

استانا. KAZINFORM- دۇيسەنبى كۇنى وڭتۇستىك كورەيانىڭ حۆاسون قالاسىنداعى ليتي اككۋمۋلياتورىن وندىرەتىن زاۋىتتان شىققان ورتتەن كەم دەگەندە 22 ادام، سونىڭ ىشىندە شەتەلدىكتەر قازا تاپتى، دەپ جازادى Yonhap.

ءبىر ادام ءىز-ءتۇزسىز جوعالىپ كەتكەندىكتەن، قازا تاپقاندار سانى ءالى دە ارتۋى مۇمكىن، دەيدى بيلىك وكىلدەرى.

قازا تاپقانداردىڭ 20 سى شەتەلدىكتەر: 18 ءى قىتاي ازاماتى، ءبىر لاوس ازاماتى جانە ازاماتتىعى انىقتالماعان ءبىر ادام بار.

سەۋلدەن وڭتۇستىككە قاراي 45 شاقىرىم جەردە ورنالاسقان حۆاسونداعى ليتي اككۋمۋلياتورلارىن شىعاراتىن Aricell زاۋىتىندا ءورت تاڭعى ساعات 10:30 شاماسىندا باستالعان. نەگىزگى ءورت وشاعى 15:10 دا باقىلاۋعا الىندى.

ءورت سوندىرۋشىلەر ءورت باستالعاننان كەيىن ءتورت ساعاتتان استام ۋاقىت وتكەن سوڭ عيماراتقا كىرىپ، مايىتتەردى تاپتى.

ءورت بەلگىسىز سەبەپتەرمەن ءۇش قاباتتى عيماراتتان شىققان.

ءورت سوندىرۋشىلەر ليتي اككۋمۋلياتورلارى ءورتىن ءداستۇرلى ادىسپەن ءسوندىرۋ قيىن بولعاندىقتان، ءورتتى تولىعىمەن ءسوندىرۋ قيىنعا سوعاتىنىن حابارلادى.

ءورت ءسوندىرۋ ءبولىمىنىڭ مالىمەتىنشە، اككۋمۋلياتورلاردىڭ ۇزدىكسىز جارىلۋى سالدارىنان جالىن تەز تارالىپ، قۇتقارۋشىلاردىڭ ىزدەۋ-قۇتقارۋ جۇمىستارىن جۇرگىزۋ ءۇشىن عيماراتقا كىرۋى قيىنداعان. الدىن الا مالىمەت بويىنشا، عيماراتتا كەم دەگەندە 35 مىڭ اككۋمۋلياتور بولعان.