بيىل وڭتۇستىك كورەيادا باستاۋىش مەكتەپتىڭ ءبىرىنشى سىنىبىنا 301442 بالا قابىلداندى. بۇل - 1964-جىلى ءتيىستى ستاتيستيكا جۇرگىزىلە باستاعالى بەرگى ەڭ تومەنگى كورسەتكىش.
كورەي ستاتيستيكالىق اقپارات قىزمەتى (KOSIS) مەن كورەي ءبىلىم بەرۋدى دامىتۋ ينستيتۋتىنىڭ (KEDI) مالىمەتىنشە، كەلەسى وقۋ جىلىندا ءبىرىنشى سىنىپقا باراتىن بالالار سانى كۇرت ازايادى. ولار - 2020-جىلى دۇنيەگە كەلگەن بالالار. سول جىلى وڭتۇستىك كورەيادا 272337 ءسابي تۋعان. بۇل 2019-جىلمەن سالىستىرعاندا 10 پايىز از.
سالىستىرمالى تۇردە ايتساق، 1968-جىلى باستاۋىش مەكتەپتىڭ ءبىرىنشى سىنىبىنا شامامەن 1 ميلليون بالا قابىلدانعان. ال 2027-جىلى بۇل كورسەتكىش ءتورت ەسە از بولادى دەپ بولجانىپ وتىر.
سونداي-اق مەكتەپ جاسىنداعى بالالار سانىنىڭ قىسقارۋى، اسىرەسە اۋىلدىق جەرلەردەگى ءبىلىم بەرۋ ۇيىمدارىنىڭ جابىلۋ قاۋپىن كۇشەيتىپ، وڭىرلەر اراسىنداعى ءبىلىم ساپاسى الشاقتىعىنىڭ ۇلعايۋىنا الاڭداۋشىلىق تۋعىزدى.
ءبىرىنشى سىنىپقا قابىلداناتىن بالالار سانى 2030-جىلعا دەيىن تومەندەي بەرەدى دەپ بولجانىپ وتىر. الايدا كورسەتكىش 200 مىڭنان تومەندەمەيدى. تۋۋ دەڭگەيىنىڭ قايتا ءوسۋى بۇل ءۇردىستى ءبىرشاما باسەڭدەتۋى مۇمكىن.
بۇعان دەيىن ەۋروپادا تۋۋ كورسەتكىشى تاريحي ەڭ تومەنگى دەڭگەيگە تۇسكەنى حابارلانعان بولاتىن.