سەدجون قالاسىنا كوشىرىلەتىن مەكەمەلەر قاتارىندا سىرتقى ىستەر، بىرىگۋ، ۇلتتىق قورعانىس مينيسترلىكتەرى دە بار. كوش مەكەمەلەردىڭ قاجەتتىلىكتەرىن ەسكەرە وتىرىپ، كەڭسەلەردىڭ دايىن بولۋىنا قاراي كەزەڭ-كەزەڭىمەن جۇزەگە اسىرىلادى.
كەلەسى جىلى 27 مەكەمە ۋاقىتشا جالعا الىنعان عيماراتتارعا كوشۋدى باستايدى. 2027 -جىلدىڭ ءبىرىنشى جارتىسىندا جەكە دەرەكتەردى قورعاۋ كوميسسياسى مەن ادام قۇقىقتارى جونىندەگى ۇلتتىق كوميسسيا سەكىلدى التى مەكەمە كوشسە، 2027 -جىلدىڭ ەكىنشى جارتىسىندا تاعى 19 مەكەمە قونىس اۋدارادى.
جاڭا ۇكىمەت كەشەنىنىڭ قۇرىلىسى اياقتالعاننان كەيىن باس پروكۋراتۋرا، ۇلتتىق پوليتسيا باسقارماسى جانە اۋىر قىلمىستاردى تەرگەۋ اگەنتتىگى سياقتى بىرنەشە مەملەكەتتىك ورگان كوشىرىلەدى. بۇل مەكەمەلەرگە تەرگەۋ، قاۋىپسىزدىك جانە قاداعالاۋ ءۇشىن بولەك عيماراتتار قاجەت.
مەملەكەتتىك ورگانداردى كوشىرۋ باستاماسى استانادا ۇكىمەتتىك فۋنكسيالاردىڭ شوعىرلانۋىن ازايتۋعا جانە ەلدى تەڭگەرىمدى دامىتۋ ماقساتىندا قولعا الىنىپ وتىر.
سەۋلدەن وڭتۇستىككە قاراي شامامەن 110 شاقىرىمدا ورنالاسقان سەدجونعا ەڭ الدىمەن 2012 -جىلى پرەمەر-مينيستر كەڭسەسى كوشىرىلگەن بولاتىن. كەيىننەن قالادا ونداعان ورتالىق ۇكىمەتتىك ۇيىمدار ورنالاستى.
سەدجون قالاسىنىڭ نەگىزى 2012 -جىلى قالانعان. قازىر مۇندا 400 مىڭعا جۋىق ادام تۇرادى. قالانىڭ دامۋى ءبىرقاتار مەملەكەتتىك مينيسترلىكتىڭ سەۋلدەن كوشىرىلۋىمەن تىعىز بايلانىستى.
ەندى سەدجون حالىقارالىق كونفەرەنسيالار مەن كورمەلەرگە قاتىسۋشىلاردى تارتۋدى، تۋريستىك باعدارلامالاردى كەڭەيتۋدى جانە شەتەلدىك قوناقتارعا قولايلى جاعداي جاساۋدى كوزدەپ وتىر.
قالانىڭ ەرەكشە كورىكتى ورىندارىنىڭ ءبىرى - ۇكىمەتتىك كەشەننىڭ توبەسىندە ورنالاسقان ۇزىندىعى 3,6 شاقىرىمعا جۋىق باق. ول 15 مەملەكەتتىك عيماراتتى بىرىكتىرىپ تۇر. 2016 -جىلى بۇل نىسان الەمدەگى ەڭ ۇلكەن شاتىر باعى رەتىندە گيننەستىڭ رەكوردتار كىتابىنا ەنگەن. باق تۇرعىندار مەن تۋريستەردىڭ سەرۋەندەپ، دەمالۋىنا ارنالعان. ونىڭ بيىگىنەن قالانىڭ پانورامالىق كورىنىسىن تاماشالاۋعا بولادى.
سەدجوننىڭ تاعى ءبىر ەرەكشەلىگى - جەراستى قالدىق جيناۋ جۇيەسى مەن ءوزارا بايلانىسقان ۇكىمەتتىك عيماراتتار. مۇنداي ينفراقۇرىلىم قالانىڭ «اقىلدى قالا» تۇجىرىمداماسى نەگىزىندە دامىپ جاتقانىن كورسەتەدى.
تۋريستەر نازارىن اۋداراتىن تاعى ءبىر نىسان - كىمگان وزەنى ارقىلى سالىنعان ۇزىندىعى 1446 مەترلىك يىن كوپىرى. ونىڭ ۇزىندىعى كەزدەيسوق تاڭدالماعان. بۇل سان 1446 -جىلى سەدجون پاتشانىڭ كورەي ءالىپبيىن تانىستىرعان «حۋنميندجونىم» ەڭبەگىنىڭ جاريالانۋىمەن بايلانىستى.
زاماناۋي ساۋلەتىمەن قاتار قالادا تاريحي ورىندار دا ساقتالعان. ماسەلەن، 1931 -جىلى اشىلعان ءداستۇرلى بازار سەدجوننىڭ ەسكى بولىگىندە ءالى كۇنگە دەيىن جۇمىس ىستەپ تۇر.
الداعى ۋاقىتتا وڭىرگە تۋريستەر قىزىعۋشىلىعى ارتا تۇسەدى دەپ كۇتىلەدى. ويتكەنى 2027 -جىلى چحۋنچحون وڭىرىندە FISU دۇنيەجۇزىلىك ۋنيۆەرسياداسى وتەدى.