الايدا جاڭا باعدارلامانىڭ باستى ماقساتى تۋريستى سەۋل نەمەسە چەدجۋعا كوبىرەك تارتۋ ەمەس. ەل بيلىگى ساياحاتشىلاردى حالقى ازايىپ بارا جاتقان وڭىرلەرگە باعىتتاۋدى كوزدەپ وتىر.
وڭتۇستىك كورەيانىڭ مادەنيەت، سپورت جانە تۋريزم مينيسترلىگى مەن كورەيا تۋريزم ۇيىمى قازان-قاراشا ايلارىندا «2026-جىلعى كۇزگى ساياحات» ناۋقانىن وتكىزەدى. ونىڭ اياسىندا كولىك پەن قوناق ءۇي شىعىنىن ارزانداتۋدان باستاپ، ساياحاتقا جۇمسالعان اقشانىڭ ءبىر بولىگىن قايتارۋعا دەيىنگى بىرنەشە قولداۋ تەتىگى ەنگىزىلگەن.
ءبىر ەرەكشەلىگى - جەڭىلدىكتىڭ ەداۋىر بولىگى تۋريستەر كوپ باراتىن ءىرى قالالارعا ەمەس، حالقى ازايىپ جاتقان 89 وڭىرگە باعىتتالعان.
تۋريست شىعىنىنىڭ جارتىسى قالاي قايتارىلادى؟
ەڭ ۇلكەن جەڭىلدىكتىڭ ءبىرى - ساپار شىعىنىنىڭ 50 پايىزىن قايتارۋ. ارنايى باعدارلاماعا قاتىساتىن وڭىرگە باراتىن ادام الدىمەن ساپارىن جەرگىلىكتى بيلىككە تىركەپ، ماقۇلداۋ الۋى كەرەك. ساياحات اياقتالعان سوڭ جۇمساعان قاراجاتىن راستايتىن قۇجاتتاردى ۇسىنادى. شارتتار ورىندالسا، شىعىننىڭ 50 پايىزى جەرگىلىكتى ءموبيلدى سەرتيفيكات تۇرىندە قايتارىلادى. ءبىر ادامعا بەرىلەتىن ەڭ جوعارى سوما - 100 مىڭ ۆون. ال جاستار ءۇشىن 140 مىڭ ۆونعا دەيىن قاراستىرىلعان.
دەمەك بۇل بارلىق ءتۋريستىڭ كارتاسىنا قولما-قول اقشا تۇسەدى دەگەن ءسوز ەمەس. قاراجات ناقتى تالاپتار ورىندالعان جاعدايدا جانە جەرگىلىكتى جەردە پايدالانىلاتىن سەرتيفيكات تۇرىندە بەرىلەدى.
حالقى از وڭىرگە بارعانى ءۇشىن دە بونۋس بەرەدى
كولىكپەن ساياحاتتايتىندارعا ارنالعان باعدارلامادا دا قىزىق شارت بار. TMAP ناۆيگاتسياسىن پايدالانعان ساياحاتشى باعدارلاماعا ەنگەن 89 ءوڭىردىڭ بىرىندەگى تۋريستىك نىساندى باعىت رەتىندە بەلگىلەپ، باستاپقى نۇكتەدەن كەمىندە 30 شاقىرىم ءجۇرۋى كەرەك. ساپار راستالعان سوڭ ارنايى بەلگى مەن ۇپاي بەرىلەدى. وسىلاي بىرنەشە وڭىرگە بارعان تۋريست 30 مىڭعا دەيىن ۇپاي جيناي الادى.
قوسىمشا بونۋس تا بار. ەلەكتروموبيل جۇرگىزۋشىلەرىنە 2 مىڭ، سيفرلىق تۋريستىك رەزيدەنت كارتاسىن پايدالانعاندارعا 5 مىڭ، ساپارى تۋرالى ۆيدەو جاريالاعاندارعا تاعى 2 مىڭ ۇپاي قاراستىرىلعان.
پويىزبەن بارسا، بيلەت قۇنىن قايتا جەڭىلدىككە اينالدىرادى
تەمىرجول ارقىلى ساياحاتتايتىندارعا ارنالعان جۇيە دە وزگەشە. Korail كومپانياسىمەن كەلىسىم جاسالعان حالقى از 41 وڭىردەگى بەلگىلەنگەن تۋريستىك نىسانعا بارىپ، ساپارىن راستاعان ادام پويىز بيلەتىنە جۇمساعان قاراجاتىنا تەڭ جەڭىلدىك كۋپونىن الا الادى.
بۇدان بولەك، بەس باعىتتاعى تاقىرىپتىق پويىزدارعا 50 پايىز جەڭىلدىك جاسالادى. Railro Pass بيلەتى دە 20 مىڭ ۆونعا ارزاندايدى. ياعني مەملەكەت تۋريستىڭ تەك دىتتەگەن جەرىنە جەتۋىنە ەمەس، سول وڭىردەگى تۋريستىك نىسانداردى ارالاۋىنا دا جاعداي جاساپ وتىر.
ۇشاقپەن ساياحاتتايتىندارعا نە ۇسىنىلادى؟
Naver Flight ارقىلى وڭتۇستىك كورەيا ىشىندەگى اۋە بيلەتىن ساتىپ العاندارعا دا بونۋس بەرىلەدى. ماتەريكتەگى باعىتتارعا ۇشاتىن جولاۋشى ءبىر بيلەت ءۇشىن 10 مىڭ ۆون كولەمىندە Naver Pay ۇپايىن الا الادى. ءبىر برون بويىنشا ءتورت ادامعا دەيىن جەڭىلدىك قاراستىرىلعان. چەدجۋ باعىتى بويىنشا ءار جولاۋشىعا 5 مىڭ ۆوننان بەرىلەدى.
قوناق ۇيگە جەڭىلدىك: 80 مىڭ كۋپون تاراتىلادى
22-قىركۇيەكتەن باستاپ استانالىق ايماقتان تىس جەرلەردەگى قوناق ۇيلەرگە شامامەن 80 مىڭ جەڭىلدىك كۋپونى تاراتىلادى. كۋپوندار ونلاين تۋريستىك پلاتفورمالاردا ءبىر ادامعا ءبىر دانادان، قور تاۋسىلعانشا بەرىلەدى.
بيىل العاش رەت ارالدارداعى قوناقۇيلەرگە جەكە جەڭىلدىك ەنگىزىلگەن. قۇنى 70 مىڭ ۆوننان اساتىن قوناقۇيگە 50 مىڭ ۆونعا دەيىن، ال ودان ارزان ورىندارعا 30 مىڭ ۆون جەڭىلدىك بەرىلەدى. كەمپينگتى قالايتىندارعا دا مۇمكىندىك بار. CampingTalk جانە Camfit پلاتفورمالارىنداعى رەسمي كەمپينگتەرگە 10 مىڭ ۆوندىق جەڭىلدىك قاراستىرىلعان.
تۋريستىك كولىككە دە 50 پايىز جەڭىلدىك بار
باعدارلاما تەك بيلەت پەن قوناقۇيمەن شەكتەلمەيدى. ەل بويىنشا تۋريستىك تاكسي مەن قالانى ارالايتىن تۋريستىك اۆتوبۋستارعا 50 پايىزعا دەيىن، ەڭ كوبى 50 مىڭ ۆون جەڭىلدىك بەرىلەدى.
تەڭىز جاعالاۋىنداعى 64 قالا مەن اۋداندا ەكولوگيالىق كولىكتەردى جالداۋ دا ارزاندايدى. گيبريد، ەلەكتر نەمەسە LPG كولىگىن كەمىندە 24 ساعاتقا جالداسا، 10 مىڭ ۆون، 48 ساعاتتان ارتىق پايدالانسا، 20 مىڭ ۆون جەڭىلدىك قاراستىرىلعان. چەدجۋدا جەڭىلدىك مولشەرى بولەك ەسەپتەلەدى.
ءتىپتى اۋىلعا بارىپ دەمالۋعا ىنتالاندىرادى
كۇزگى ناۋقانعا باسقا مەملەكەتتىك مەكەمەلەر دە قوسىلعان. قازان ايىندا شاعىن اۋىلدىق تۋريستىك باعدارلامالارعا 50 پايىزعا دەيىن جەڭىلدىك بەرىلەدى. ونلاين پلاتفورمالارداعى اۋىلدىق دەمالىس پەن تاجىريبەلىك باعدارلامالار 30 پايىزعا، كەيبىر ورنالاستىرۋ ورىندارى 20 پايىزعا ارزاندايدى.
قاراشادا وڭتۇستىك كورەياداعى بۋددالىق حرامداردا تۇرىپ، جەرگىلىكتى مادەنيەتپەن تانىسۋعا مۇمكىندىك بەرەتىن Temple Stay باعدارلامالارىنا دا 50 پايىزعا دەيىن جەڭىلدىك جاسالادى.
وسىلايشا تۋريستىك ناۋقان كلاسسيكالىق «قوناق ءۇي بيلەت» ۇلگىسىنەن شىعىپ، اۋىل، ارال، جاعالاۋ جانە ءدىني-مادەني تۋريزمدى دە قامتىپ وتىر.
نەگە كورەيا تۋريستەرگە مۇنشا جەڭىلدىك بەرىپ وتىر؟
باعدارلامانىڭ استارىندا تەك تۋريستىك ماۋسىمدى ۇزارتۋ ماقساتى تۇرعان جوق. جەڭىلدىكتەردىڭ نەگىزگى بولىگى حالقى ازايىپ جاتقان وڭىرلەرگە باعىتتالعان. تۋريست سول جەرگە بارسا، قوناق ۇيگە ورنالاسادى، تاماقتانادى، كولىك پايدالانادى، جەرگىلىكتى تۋريستىك ورىندارعا اقشا جۇمسايدى. سوندىقتان ساياحاتشىعا بەرىلگەن جەڭىلدىك ءبىر مەزەتتە جەرگىلىكتى ەكونوميكاعا سۇرانىس قالىپتاستىرۋدىڭ قۇرالىنا اينالادى.
جاقىندا قاتتى جاۋىننان زارداپ شەككەن كودجە مەن تحونەنعا دا جەكە قولداۋ قاراستىرىلعان. بۇل قالالارعا تۋريستەردى قايتا تارتۋ ءۇشىن قوسىمشا جەڭىلدىكتەر مەن جارنامالىق باعدارلامالار ىسكە قوسىلادى.
29-قازان مەن 15-قاراشا ارالىعىندا ەلدە Korea Grand Festival ءوتىپ، تۋريستەرگە ارنالعان ءبىرقاتار باعدارلامالار تاعى كەڭەيتىلەدى.
وڭتۇستىك كورەيا وسىلايشا تۋريستى تەك ەلگە شاقىرۋمەن شەكتەلمەي، ونىڭ قايدا باراتىنىنا، قالاي ساياحاتتايتىنىنا جانە اقشاسىن قاي وڭىردە جۇمسايتىنىنا اسەر ەتەتىن جۇيە قالىپتاستىرىپ وتىر. ناتيجەسىندە ساياحاتشى شىعىنىن ازايتادى، ال تۋريستىك اعىننان تىس قالىپ جۇرگەن شاعىن قالالار مەن اۋىلدار جاڭا كەلۋشىلەرگە يە بولادى.