وڭتۇستىك كورەيانىڭ قورعانىس سالاسىنداعى ساتىپ الۋلار باسقارماسىنىڭ (DAPA) مالىمەتىنشە، ءتيىستى شەشىم 6-قاراشادا ۇلتتىق قورعانىس مينيسترلىگى جانىنداعى قورعانىس جوبالارىن قاراۋ كوميتەتىنىڭ وتىرىسىندا قابىلدانعان.
Jang Bogo N دەپ اتالاتىن جوبا اياسىندا وڭتۇستىك كورەيادا اتومدىق ەنەرگەتيكالىق قوندىرعىمەن جابدىقتالعان، كادىمگى قارۋ- جاراقپەن جاراقتاندىرىلاتىن سۇڭگۋىر قايىقتاردى ازىرلەۋ جانە قۇراستىرۋ كوزدەلىپ وتىر.
العاشقى سۇڭگۋىر قايىقتى 2030 -جىلداردىڭ ورتاسىندا سۋعا ءتۇسىرۋ جوسپارلانعان. ونى قارۋلى كۇشتەردىڭ قۇرامىنا ەنگىزۋ 2030 -جىلداردىڭ ەكىنشى جارتىسىندا نەمەسە ودان كەيىنگى كەزەڭدە جۇزەگە اسۋى مۇمكىن.
2027 -جىلدىڭ ءبىرىنشى جارتىسىندا جوباعا جاۋاپتى ءوندىرۋشى اشىق كونكۋرس ارقىلى تاڭدالادى. ال جىل سوڭىنا دەيىن ءتيىستى كەلىسىمشارت جاساسۋ جوسپارلانىپ وتىر. جوبانى جۇزەگە اسىرۋدى جەدەلدەتۋ ماقساتىندا ونى ەكونوميكالىق تيىمدىلىككە الدىن الا باعالاۋ راسىمىنەن بوساتۋ تۋرالى شەشىم قابىلدانعان.
سۇڭگۋىر قايىقتاردى جابدىقتاۋ ءۇشىن شاعىن مودۋلدىك يادرولىق رەاكتورلاردى پايدالانۋ كوزدەلگەن. ا ق ش بۇل رەاكتورلاردا ۋران-235 يزوتوپىنىڭ بايىتىلۋ دەڭگەيى 20 پايىزدان تومەن بولاتىن تومەن بايىتىلعان ۋراندى قولدانۋعا كەلىسىم بەرگەن.
DAPA مالىمەتىنشە، بۇل باعدارلاما ك ح د ر تاراپىنان تونەتىن يادرولىق جانە زىمىراندىق قاتەرلەر جاعدايىندا ەلدىڭ قورعانىس قابىلەتىن نىعايتۋعا باعىتتالعان.
جوبانىڭ تۇپكىلىكتى بيۋدجەتى ازىرگە بەكىتىلگەن جوق. بۇقارالىق اقپارات قۇرالدارىنىڭ حابارلاۋىنشا، وڭتۇستىك كورەيا ءارقايسىسىنىڭ سۋ ىعىستىرعىش كولەمى شامامەن 8 مىڭ توننا بولاتىن كەمىندە ءۇش اتومدىق سۇڭگۋىر قايىق سالۋدى قاراستىرىپ وتىر.
باعدارلامانىڭ جالپى قۇنى شامامەن 21,3 ميلليارد ا ق ش دوللارى باعالانىپ وتىر.
بۇعان دەيىن اتوم ەنەرگياسى جونىندەگى حالىقارالىق اگەنتتىكتىڭ (ماگاتە) باس ديرەكتورى رافاەل گروسسي وڭتۇستىك كورەيانى اتومدىق سۇڭگۋىر قايىقتار جاساۋ باعدارلاماسىن ىسكە اسىرۋ بارىسىندا يادرولىق قارۋدىڭ تارالۋىنا جول بەرمەۋ ماقساتىندا اگەنتتىكپەن تىعىز ىنتىماقتاستىق ورناتۋعا شاقىرعان بولاتىن.
بۇعان دەيىن سولتۇستىك كورەيا تاعى دا جاڭا زىمىران ۇشىرعانىن جازدىق.