اتالعان كورسەتكىش 2024 -جىلمەن سالىستىرعاندا 0,2 پايىزدىق تارماققا وسكەن. بۇل قىتايدىڭ ەلدە «وقيتىن قوعام» قالىپتاستىرۋ باعىتىنداعى كۇش-جىگەرىن ايقىندايدى.
ساۋالنامانى قىتايدىڭ باسپا ءسوز جانە باسىلىمدار اكادەمياسى جۇرگىزىپ، ونىڭ ناتيجەلەرى نانچان قالاسىندا وتكەن حالىق اراسىندا وقۋدى ناسيحاتتاۋ جونىندەگى 5-كونفەرەنسيادا جاريالاندى.
ساۋالناماعا سايكەس، 2025 -جىلى قىتايدىڭ ەرەسەك ازاماتتارى قاعاز جانە ەلەكتروندى فورماتتى قوسا العاندا ورتا ەسەپپەن 8,39 كىتاپ وقىعان. ال سيفرلىق وقۋعا ارنالعان شىعارمالاردىڭ جالپى سانى 70 ميلليون اتاۋدان استى.
سونداي-اق زەرتتەۋ ناتيجەسى وتكەن جىلى قىتاي ەرەسەكتەرىنىڭ 80,8 پايىزى سيفرلىق وقۋمەن اينالىسقانىن كورسەتتى. اۋديوكىتاپتار مەن كىتاپتارعا ارنالعان بەينەرەتسەنزيالارعا قىزىعۋشىلىق تا ارتقان: 2024 -جىلى بۇل كورسەتكىشتەر تيىسىنشە 38,5 جانە 5,7 پايىز بولسا، 2025-جىلى 38,7 جانە 6,3 پايىزعا جەتكەن.
جوعارى سۇرانىس نارىقتىڭ دامۋىنا سەرپىن بەردى. ساۋالناماعا سايكەس، قىتايدىڭ جاپپاي سيفرلىق وقۋ نارىعى سوڭعى بەس جىلدا ەكى ەسەگە جۋىق ءوسىپ، 30,25 ميلليارد يۋاننان (شامامەن 4,4 ميلليارد ا ق ش دوللارى) 59,48 ميلليارد يۋانعا دەيىن ۇلعايعان.
سوعان قاراماستان، قاعاز كىتاپتار ءوز تارتىمدىلىعىن ساقتاپ وتىر: قىتاي ەرەسەكتەرىنىڭ 45,9 پايىزى ءالى دە وسى فورماتتى باسقا وقۋ تۇرلەرىنەن جوعارى قويادى. ال مازمۇن جاعىنان كوركەم ادەبيەت ەرەكشە سۇرانىسقا يە بولعان.
بۇل قوعامنىڭ سيفرلىق وقۋدىڭ ىڭعايلىلىعىن پايدالانعانىمەن، تەرەڭ ويعا بويلاۋ، جۇيەلى ءبىلىم الۋ جانە رۋحاني بايۋعا دەگەن قاجەتتىلىگىنىڭ تومەندەمەگەنىن كورسەتەدى.
قىتاي باسپاگەرلەر قاۋىمداستىعىنىڭ ءتوراعاسى ۋ شۋلين سيفرلىق داۋىردە تەرەڭ وقۋ جەكە دامۋ، كاسىبي جەتىستىك جانە ادامگەرشىلىك تاربيەنىڭ نەگىزى بولىپ قالا بەرەتىنىن ايتتى.
ول سيفرلىق وقۋدى دۇرىس باعىتتاۋدى كۇشەيتىپ، وقىرمانداردى «ۇزىك- ۇزىك قاراۋدان» «تەرەڭ وقۋعا» كوشۋگە ىنتالاندىرۋ ارقىلى تەرەڭ وقۋ مادەنيەتىن قالىپتاستىرۋعا شاقىردى.