بۇگىن وتباسىنىڭ سيفرلىق كارتاسىنىڭ (و ت س ك) جۇمىس ىستەۋ قاعيداتتارىنا توقتالامىز.
وتباسىنىڭ سيفرلىق كارتاسى سيفرلىق كوپىر ىسپەتتى جۇمىس ىستەپ، 30 دان استام مەملەكەتتىك اقپاراتتىق جۇيەدەن قاجەتتى مالىمەتتەردى اۆتوماتتى تۇردە الادى.
دەرەكتەر الماسۋ «ەلەكتروندىق ۇكىمەت» شليۋزى ارقىلى جۇزەگە اسىرىلادى.
جالپى مالىمەتتەردىڭ ۇشتەن بىرىنە جۋىعى، ياعني 10 اقپاراتتىق جۇيەدەگى دەرەكتەر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءوز بازالارىنان الىنادى.
ولاردىڭ قاتارىندا زەينەتاقىلار، جاردەماقىلار مەن وزگە دە تولەمدەر، مۇگەدەكتىك، ەڭبەك شارتتارى جانە سوڭعى ءۇش ايداعى رەسمي تابىستار تۋرالى مالىمەتتەر بار.
مالىمەتتەردىڭ ەداۋىر بولىگى ادىلەت مينيسترلىگىنە (5 جۇيە) جانە ىشكى ىستەر مينيسترلىگىنە (4 جۇيە) قاراستى اقپاراتتىق جۇيەلەردەن تۇسەدى.
وسى ۆەدومستۆولاردىڭ دەرەكقورلارى ارقىلى وتباسىنىڭ سيفرلىق كارتاسى وتباسىنىڭ قۇرامى، تۇرعىلىقتى جەرى بويىنشا تىركەلۋى، تۇرعىن ءۇي، جەر ۋچاسكەلەرى، كاسىپكەرلىك قىزمەتى مەن اۆتوكولىكتەرى تۋرالى مالىمەتتەردى الادى.
قالعان اقپارات سيفرلىق دامۋ، دەنساۋلىق ساقتاۋ، قارجى، اۋىل شارۋاشىلىعى مينيسترلىكتەرىنىڭ، سونداي-اق وقۋ-اعارتۋ مينيسترلىگى مەن ۇ ق ك شەكارا قىزمەتىنىڭ اقپاراتتىق جۇيەلەرىنەن الىنادى. بۇل رەتتە جۇيە ءارتۇرلى دەرەكتەردى جيناعانىمەن، ولاردىڭ بارلىعى بىردەي وتباسىنىڭ ءال-اۋقاتىن باعالاۋ كەزىندە قولدانىلا بەرمەيتىنىن ءتۇسىنۋ ماڭىزدى.
ءارتۇرلى مەملەكەتتىك ورگانداردىڭ ونداعان اقپاراتتىق جۇيەسىنەن الىنعان مالىمەتتەر ءار وتباسىنىڭ ءبىرىڭعاي تسيفرلىق بەينەسىن قالىپتاستىرۋ ءۇشىن بىرىكتىرىلەدى.
الايدا وتباسىنىڭ الەۋمەتتىك ءال-اۋقاتىن باعالاۋ كەزىندە تەك رەسمي ادىستەمەدە بەلگىلەنگەن ولشەمشارتتاردى قولدانۋعا قاجەتتى مەملەكەتتىك ورگانداردىڭ دەرەكتەرى عانا پايدالانىلادى.
ۆەدومستۆولار اراسىندا دەرەكتەر الماسۋ ۇدەرىسىن ءۇش كەزەڭگە ءبولىپ قاراستىرۋعا بولادى.
ءبىرىنشى كەزەڭ- وتباسى قۇرامىن قالىپتاستىرۋ
بۇل كەزەڭدە جۇيە جەكە تۇلعالار بازاسى مەن ازاماتتىق حال اكتىلەرى تىركەلىمىندەگى مالىمەتتەردى بىرىكتىرەدى. تۋۋ، نەكەگە تۇرۋ، نەكەنى بۇزۋ نەمەسە تەگىن وزگەرتۋ تۋرالى جازبالار نەگىزىندە وتباسىنىڭ سيفرلىق كارتاسى ادامنىڭ قاتىسۋىنسىز ءار وتباسىنىڭ وزەكتى قۇرامىن اۆتوماتتى تۇردە انىقتايدى.
ەكىنشى كەزەڭ- بەيىندى مەملەكەتتىك ورگانداردان مالىمەت جيناۋ
وتباسىنىڭ ءاربىر مۇشەسى بويىنشا جالاقى، مۇلىك، كرەديتتىك مىندەتتەمەلەر جانە ومىرلىك جاعدايلارعا قاتىستى دەرەكتەر جيناقتالادى.
جۇيە ازاماتتىڭ ەمحاناعا تىركەلگەنىن، مەديتسينالىق ساقتاندىرۋىنىڭ بار-جوعىن، مەكتەپتە نەمەسە جوعارى وقۋ ورنىندا ءبىلىم الىپ جاتقانىن، سونداي-اق شەتەلدە 180 كۇننەن استام ۋاقىت بولۋى تۋرالى دا مالىمەتتەردى كورە الادى.
ءۇشىنشى كەزەڭ - دەرەكتەردى جاڭارتۋ جانە قايتا ەسەپتەۋ
مالىمەتتەر ەكى ءتۇرلى تارتىپپەن جاڭارتىلادى. ء بىرقاتار اقپاراتتىق جۇيەلەر دەرەكتەردى ناقتى ۋاقىت رەجيمىندە (ونلاين) بەرسە، ەندى ءبىر بولىگى اقپاراتتى بەلگىلەنگەن كەستەگە سايكەس بەلگىلى ءبىر ۋاقىت ارالىعىندا توپتاپ جىبەرەدى.
جاڭارتىلعان مالىمەتتەر نەگىزىندە وتباسىنىڭ سيفرلىق كارتاسى ءار اي سايىن وتباسىنىڭ ءال-اۋقات دەڭگەيىن قايتا باعالايدى.
ماڭىزدى! وتباسىنىڭ تسيفرلىق كارتاسى باسقا مەملەكەتتىك ورگانداردىڭ اقپاراتتىق جۇيەلەرىندەگى مالىمەتتەردى عانا كورسەتەدى.
ەگەر جۇمىس بەرۋشى ەڭبەك شارتىن دەرەكقورعا كەش ەنگىزسە، ءبىلىم بەرۋ ۇيىمى ءبىلىم الۋشىلار ءتىزىمىن ۋاقىتىلى جاڭارتپاسا نەمەسە ا ح ا ت- تىڭ ەسكى ارحيۆتەرىندە كەيبىر جازبالار بولماسا، وتباسىنىڭ سيفرلىق كارتاسىندا قاتە مالىمەتتەر كورسەتىلۋى مۇمكىن.
ەگەر ءوز دەرەكتەرىڭىزدەن قاتە بايقاساڭىز، مىسالى، ساتىلعان اۆتوكولىك نەمەسە پاتەر ءالى دە ءسىزدىڭ اتىڭىزدا تىركەلىپ تۇرسا، ونى تۇزەتۋگە بولادى.
ول ءۇشىن تۇرعىلىقتى جەرىڭىز بويىنشا قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنە قاراستى حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ اۋماقتىق دەپارتامەنتىنە جۇگىنىپ، كەڭەس الۋىڭىز قاجەت.
- مالىمەتتىڭ باستاپقى دەرەككوزى جاڭارتىلعاننان كەيىن، وتباسىنىڭ سيفرلىق كارتاسى الەۋمەتتىك ءال-اۋقات دەڭگەيىن كەزەكتى اي سايىنعى باعالاۋ بارىسىندا دۇرىس اقپاراتتى اۆتوماتتى تۇردە الادى. قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى وتباسىنىڭ تسيفرلىق كارتاسىنىڭ جۇمىس ەرەكشەلىكتەرى تۋرالى ازاماتتاردى جان-جاقتى اقپاراتتاندىرۋدى جالعاستىرادى، - دەلىنگەن حابارلامادا.
بۇعان دەيىن قازاقستاندىقتاردىڭ ءال-اۋقاتى قالاي باعالاناتىنىن جازعان ەدىك.