ا ساناتىنا ءال-اۋقاتى جوعارى وتباسىلار، ال ب ساناتىنا اۋقاتتى وتباسىلار جاتادى.
ساناتتى انىقتاعان كەزدە وتباسىنىڭ تابىسى عانا ەمەس، جىلجىمايتىن مۇلكى، كولىگى، كاسىبى، جەر ۋچاسكەلەرى جانە باسقا دا اكتيۆتەرى ەسكەرىلەدى.
مىسالى، ا ساناتىنا ءار وتباسى مۇشەسىنە شاققانداعى تابىسى 7 كۇنكورىس مينيمۋمىنان اساتىن، ۇلكەن اۋماقتى جىلجىمايتىن مۇلكى، ليۋكس ساناتىنداعى كولىگى، بيزنەسى جانە باسقا دا اكتيۆتەرى بار وتباسىلار جاتادى.
ال ب ساناتىنا ءار ادامعا شاققانداعى تابىسى 6-دان 7 كۇنكورىس مينيمۋمىنا دەيىنگى، جايلى باسپاناسى، پرەميۋم ساناتىنداعى كولىگى، كاسىپكەرلىك قىزمەتى جانە باسقا دا مۇلكى بار وتباسىلار كىرەدى.
الايدا وسى بەلگىلەردىڭ بىرەۋىنىڭ بولۋى وتباسى اۆتوماتتى تۇردە بەلگىلى ءبىر ساناتقا جاتقىزىلادى دەگەندى بىلدىرمەيدى.
وتباسىنىڭ ءال-اۋقاتى وتباسىنىڭ سيفرلىق كارتاسى ارقىلى 50-دەن استام ولشەم نەگىزىندە باعالانادى. ولاردىڭ قاتارىندا تابىس دەڭگەيى، جۇمىسپەن قامتىلۋى، مۇلكى، نەسيەلەرى جانە الەۋمەتتىك جاعدايى بار.
سونىمەن قاتار وتباسىنىڭ ساناتى تۇراقتى بولىپ قالمايدى. ومىرلىك جاعدايى وزگەرسە، ساناتى دا قايتا قارالۋى مۇمكىن.
ايتا كەتەلىك الەۋمەتتىك تولەم قالاي وزگەرەدى: مينيستر مۇقتاج وتباسىلاردى قولداۋ تەتىگىن تۇسىندىرگەن ەدى.