وتباسىلاردان بالالاردى تارتىپ الۋ تۋرالى اقپارات شىندىققا سايكەس كەلمەيدى - مينيسترلىك

استانا. KAZINFORM - وتباسىلاردان بالالاردى تارتىپ الۋعا قاتىستى بارلىق اقپارات شىندىققا سايكەس كەلمەيدى، دەپ ءمالىم دەدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.

باسپاءسوز قىزمەتىنىڭ مالىمەتتەرىنە قاراعاندا، سوڭعى ۋاقىتتا الەۋمەتتىك جەلىلەردە ءبىلىم بەرۋ، بالالاردىڭ قۇقىقتارىن قورعاۋ جانە ايەلدەر قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا ازىرلەنگەن ەكى زاڭ جوباسىندا وتباسىلاردان بالالاردى مەملەكەتتىك ورگانداردىڭ تارتىپ الىپ قويۋىنا مۇمكىندىك بەرەتىن نورمالار بار دەگەن جاڭساق اقپارات تاراتىلۋدا.

«وتباسىلاردان بالالاردى تارتىپ الۋعا قاتىستى بارلىق اقپارات شىندىققا سايكەس كەلمەيدى»، - دەلىنگەن مينيسترلىك تاراتقان حابارلامادا.

سونداي-اق ونداعى مالىمەتتەرگە قاراعاندا، قارالىپ وتىرعان جانە ماجىلىستەگى باسقا دا زاڭ جوبالارىندا بالالاردى وتباسىلاردان تارتىپ الىنۋىنا قاتىستى بىردە-ءبىر نورما جوق.

مەملەكەتتىك ساياسات: بالانىڭ تۋعان وتباسىندا تاربيەلەنۋ قۇقىعىن قامتاماسىز ەتۋگە جانە بالالاردى تاربيەلەۋ مەن قاۋىپسىزدىگىن ساقتاۋ ماسەلەلەرىندە ەڭ الدىمەن اتا-انالارعا باسىمدىق بەرۋگە باعىتتالعان.

مەملەكەت ۇنەمى ومىرلىك قيىن جاعدايعا تاپ بولعان وتباسىلاردى قولداۋعا ارنالعان ءتيىمدى شارالار قابىلداپ كەلەدى. كامەلەتكە تولماعانداردىڭ ىستەرى جونىندەگى كوميسسيالار، قۇرىلعان پسيحولوگيالىق جانە وتباسىن قولداۋ ورتالىقتارىنىڭ جۇمىسى شەڭبەرىندە وسىنداي وتباسىلارعا تۇراقتى تۇردە كومەكتەر كورسەتىلۋدە.

بالالاردىڭ قۇقىقتارىن قورعاۋ كوميتەتىنىڭ مىندەتى - ءار بالانىڭ بارىنشا تۋعان وتباسىندا ءومىر ءسۇرۋ جانە تاربيەلەنۋ قۇقىعىن جۇزەگە اسىرۋ بولىپ تابىلادى.

ەستەرىڭىزگە سالا كەتەيىك، بالانىڭ ومىرىنە نەمەسە دەنساۋلىعىنا تىكەلەي قاۋىپ تونگەن كەزدە ونىڭ قۇقىقتارىن قورعاۋ قولدانىستاعى زاڭناماعا سايكەس جانە ناقتى قاۋىپ تۋىنداعان كەزدە عانا جۇزەگە اسىرىلادى.

«بۇگىنگى تاڭدا ق ر «نەكە (ەرلى-زايىپتىلىق) جانە وتباسى تۋرالى» كودەكسىنىڭ 82-بابىنىڭ شەڭبەرىندە ۋاكىلەتتى ورگاندار (قورعانشىلىق جانە قامقورشىلىق ورگاندارى) بالانىڭ ومىرىنە نەمەسە دەنساۋلىعىنا تىكەلەي قاتەر تونگەن كەزدە بالانى بالالار ۇيىمىنا، ياعني بالالاردى قولداۋ ورتالىعىنا ۋاقىتشا جىبەرۋ تۋرالى شارالار قولدانۋعا قۇقىلى. قۇرمەتتى اتا-انالار! سىزدەردەن اقپاراتتى تەك راستالعان، رەسمي كوزدەردەن الۋدى سۇرايمىز»، - دەلىنگەن مينيسترلىك تاراتقان اقپاراتتا.

اۆتور

ايدار وسپاناليەۆ