وتباسى بانك قاشان يسلامدىق يپوتەكا بەرە باستايدى

استانا. KAZINFORM - بۇگىن استانادا «وتباسى بانك» يسلامدىق قارجى جانە بيزنەس قاۋىمداستىعىمەن جانە قۇرىلىسشىلار وداعىمەن بىرلەسىپ مەموراندۋمعا قول قويدى.

تولىعىراق يسلامدىق قارجى جانە بيزنەس قاۋىمداستىعىنىڭ ءتوراعاسى، استانا حالىقارالىق قارجى ورتالىعىنىڭ يسلام قارجى باعىتى بويىنشا جەتەكشىسى ءمادينا تۋكۋلوۆا ايتىپ بەردى.

- مەموراندۋم ارقىلى ءبىز قازاقستاندا «وتباسى بانك» تاراپىنان يسلامدىق يپوتەكانى ەنگىزۋ مەحانيزمدەرىن بىرلەسىپ پىسىقتاۋدى كوزدەپ وتىرمىز. قازىر مۇمكىن قۇرالدار ازىرلەنىپ جاتىر، وزدەرىڭىز بىلەتىندەي، قازاقستاندا ءداستۇرلى بانكتەردىڭ يسلامدىق قارجىلاندىرۋ ۇسىنۋعا مۇمكىندىگى جوق. قازىر قارجى نارىعىن رەتتەۋ جانە دامىتۋ اگەنتتىگى جاڭا بانك تۋرالى زاڭ اياسىندا ءداستۇرلى بانكتەرگە يسلامدىق قارجىلاندىرۋ مۇمكىندىگىن بەرەتىن «يسلامدىق تەرەزەلەردى» ەنگىزۋ ماسەلەسىن تالقىلاپ جاتىر. الايدا قازىرگى ۋاقىتتا ناقتى مەحانيزمدەر بولماعاندىقتان ءبىز «وتباسى بانكپەن» بىرلەسىپ، جاقىن ارادا بۇل باستامانى ەلىمىزدە قالاي ىسكە اسىرۋعا بولاتىنىن قاراستىرىپ جاتىرمىز، - دەدى ءمادينا تۋكۋلوۆا ەلوردادا ءوتىپ جاتقان يسلامدىق قارجىلاندىرۋ جانە بيزنەس فورۋمىندا.

ونىڭ ايتۋىنشا، ءدال قازىر ءداستۇرلى بانكتەردىڭ يسلامدىق قارجىلاندىرۋ مۇمكىندىگىنىڭ قانداي فورمادا بولاتىنى ازىرگە ناقتى بەلگىسىز، ءبىراق باستاما بار.

- ءبىز رەتتەۋشىدەن ناقتى اقپاراتتى كۇتىپ وتىرمىز جانە قاۋىمداستىق رەتىندە قابىلداناتىن قۇجاتتارعا ساراپتامالىق قولداۋ كورسەتۋگە دايىنبىز. ءبىزدىڭ ماقسات - قۇجاتتاردىڭ ساپالى ءارى مازمۇندى بولۋىنا اتسالىسۋ. الايدا مەرزىم بويىنشا ناقتى مالىمەتتەر جوق. تۇسىنۋىمشە، بانك تۋرالى جاڭا زاڭنىڭ مەرزىمىنە بايلانىستى بولادى، ياعني، جاڭا زاڭ اياسىندا يسلامدىق تەرەزەلەرگە قاتىستى باپ ەنگىزىلەدى. زاڭدى جىل سوڭىنا دەيىن قابىلداۋدى جوسپارلاپ وتىر، - دەيدى ول.

استانادا العاش يسلامدىق قارجىلاندىرۋ جانە بيزنەس فورۋمى ءوتىپ جاتىر. فورۋمدى يسلامدىق قارجى جانە بيزنەس قاۋىمداستىعى TIDAM اگەنتتىگىمەن بىرلەسىپ، استانا حالىقارالىق قارجى ورتالىعىنىڭ قولداۋىمەن ۇيىمداستىرىپ وتىر. وعان 200 دەن استام ادام قاتىستى.

ايتا كەتەيىك، استانادا العاش يسلامدىق قارجىلاندىرۋ جانە بيزنەس فورۋمى ءوتىپ جاتىر.