وتاردا كوماعا تۇسكەن سارباز ەسىن جيدى

استانا. KAZINFORM - جامبىل وبلىسى وتار اۋىلىندا اسكەردە ءجۇرىپ كوماعا تۇسكەن 19 جاستاعى سارباز ەسىن جيدى. بۇل تۋرالى ساربازدىڭ اكەسى تيمۋر جانالين ءوزىنىڭ Instagram-داعى پاراقشاسىندا ءمالىم ەتتى.

«ۇزاق ۋاقىت بويى بىزگە جان-جاقتى قولداۋ كورسەتىپ، ۇلىمىز ءۇشىن دۇعا ەتكەندەردىڭ بارىنە تاعى دا العىسىمىزدى بىلدىرگىمىز كەلەدى. ءبىز سىزدەرگە ۇلىمىزدىڭ كومادان شىققانى تۋرالى قۋانىشتى جاڭالىقتى جەتكىزۋگە اسىقپىز. قازىر دارىگەرلەر ايتقانداي، ول ساڭىراۋ كۇيدە. ءبىزدى تانيدى، بۇرىن جاسالعان تراحەوستومياعا بايلانىستى ءالى سويلەي المايدى. ءبىراق جاعدايى اۋىر، دياليز جاسالادى. ول شامامەن 6-8 ساعاتتى الادى. دارىگەرلەر قولدان كەلگەننىڭ ءبارىن جاساپ جاتىر. سول ءۇشىن ولارعا العىس ايتامىز»، - تيمۋر جانالين.

ايتا كەتەيىك، جامبىل وبلىسىندا سارباز جانساقتاۋ بولىمىنە تۇسكەن ەدى. وقيعا 9-ماۋسىم كۇنى بولعان. جامبىل وبلىستىق دەنساۋلىق ساقتاۋ باسقارماسى باسپا ءسوز قىزمەتى ساربازدىڭ جاعدايى اۋىر ەكەنىن مالىمدەگەن.

«ناۋقاس 9-ماۋسىم كۇنى گۆاردەيسك اسكەري گوسپيتالىنەن جەدەل جاردەم كولىگىمەن جەتكىزىلدى. قورداي ورتالىق اۋداندىق اۋرۋحاناسىنا «پوليسەگمەنتالدى پنيەۆمونيا» دياگنوزىمەن جاتقىزىلدى. وڭ جاقتا پليەۆريت. 3-4 دارەجەلى جۇقپالى توكسيكالىق شوك. سەپسيس. ميدىڭ گيپوكسيالىق ءىسىنۋى، سەرەبرالدى كوما 2-3. دۆس سيندرومى. ناۋقاس كلينيكالىق ءولىمدى باستان كەشكەن. قازىرگى ۋاقىتتا ناۋقاستىڭ جاعدايى وتە اۋىر، كوپتەگەن مۇشەلەر جەتكىلىكسىزدىگى بايقالادى. اتاپ ايتقاندا، تىنىس الۋ، جۇرەك، باۋىر، سەرەبرالدى جانە ينفەكسيالىق توكسيكالىق شوك بەلگىلەرى بار. گەموفيلتراتسيا جانە ءدارى-دارمەكپەن ەمدەلەدى»، - دەلىنگەن حابارلامادا.

پرەزيدەنت ساربازدىڭ كوماعا تۇسۋىنە قاتىستى ءمان-جايدى زەرتتەپ، كىنالى ادامداردى جازالاۋدى تالاپ ەتتى.

قورعانىس مينيسترلىگى جامبىل وبلىسى گۆاردەيسك گارنيزونىندا اۋرۋحانادا جاتقان ساربازدىڭ جاعدايىنا وراي رەسمي مالىمدەمە جاسادى.

اۆتور

ەلميرا ورالبايەۆا