وتاندىق وندىرۋشىلەر قىتايدا ارنايى ورتالىقتا ءوز تاۋارلارىن ساتا الادى
جياڭسۋ. KAZINFORM - ساۋدا جانە ينتەگراتسيا ءمينيسترى ارمان شاققاليەۆ ق ح ر-عا جۇمىس ساپارىن جياڭسۋ پروۆينتسياسىندا (نانجيڭ قالاسى) جالعاستىردى.
پروۆينتسيا گۋبەرناتورى سيۋي كۋنلينمەن كەزدەسۋدە مينيستر وڭىرلەندىرۋ قاعيداتىن ىسكە اسىرۋ اياسىندا اكىمشىلىك پەن بيزنەس وكىلدەرىنىڭ بىرلەسكەن جۇمىسى وڭ ناتيجەلەر كورسەتىپ وتىرعانىن اتاپ ءوتتى.
بيىل تاۋار اينالىمىنىڭ سەرپىندى ءوسۋى جالعاسۋدا.
2024 -جىلدىڭ 7 ايىنىڭ قورىتىندىسى بويىنشا قازاقستان مەن ق ح ر اراسىنداعى ءوزارا ساۋدا وتكەن جىلدىڭ سايكەس كەزەڭىمەن سالىستىرعاندا %2,8 عا ءوسىپ، $16,8 ميلليارد قۇرادى.
ۇستىمىزدەگى جىلدىڭ 7 ايىندا قازاقستان مەن جياڭسۋ پروۆينتسياسى اراسىنداعى تاۋار اينالىمى $723,3-تەن $1 758,1 ميلليونعا دەيىن 2,4 ەسە ءوستى.
مينيستر ورتا ەسەپپەن العاندا جىل سايىن جياڭسۋ $266,8 ميللياردتان استام سوماعا ءونىم يمپورتتايتىنىن اتاپ ءوتتى، بۇل - نەگىزىنەن ونەركاسىپ جانە اۋىل شارۋاشىلىعى تاۋارلارى.
وسىعان بايلانىستى، قازاقستان پروۆينتسيانىڭ كريتيكالىق يمپورتىنىڭ كوپتەگەن پوزيتسيالارى بويىنشا ساپالى جەتكىزىلىمدەردى قامتاماسىز ەتۋگە دايىن.
ءوز كەزەگىندن گۋبەرناتور سيۋي كۋنلين قازاقستانمەن ستراتەگيالىق ىنتىماقتاستىقتى تولىق قولدايتىنىن، بۇل ءۇشىن نانجيڭ قالاسىندا قازاقستانمەن ساۋدا مەن ينۆەستيسيالاردى دامىتۋدى كۇشەيتۋگە ىقپال ەتەتىن ينفراقۇرىلىم سالىنعانىن اتاپ ءوتتى.
ودان ءارى قازاقستاندىق دەلەگاتسيا پروۆينتسيا اكىمشىلىگىنىڭ جانە Jiangsu SOHO Holdings Group Co. قولداۋىمەن بوي كوتەرگەن «ورتالىق ازيا- جياڭسۋ» ساۋدا ورتالىعىنىڭ اشىلۋىنا قاتىستى.
سالتاناتتى شاراعا نانجيڭ قالاسى مەن پروۆينتسيا باسشىلىعى، قازاقستاندىق بيزنەس پەن كۆازيمەملەكەتتىك سەكتور وكىلدەرى قاتىستى.
كوپقاباتتى ورتالىق - ورتالىق ازيا ەلدەرىنىڭ كومپانيالارىن ورنالاستىرۋ جانە ولاردىڭ جۇمىسى ءۇشىن كوپ فۋنكتسيونالدى پلاتفورما.
ورتالىقتىڭ اشىلۋ سالتاناتىندا قوناقتارعا قازاقستان، وزبەكستان، تاجىكستان، تۇرىكمەنستان ەكسپورتتىق ونىمدەرى بار كورمە پاۆيلونى تانىستىرىلدى.
«بۇگىن بۇل الاڭدا 50-گە جۋىق قازاقستاندىق كومپانيا ءوز ونىمدەرىن ۇسىندى. بۇل ساتىپ الۋشىلارعا قازاقستاندىق ونىمدەرمەن جەكە تانىسۋعا مۇمكىندىك بەرەدى. ارينە، وسى الاڭدا ءوز ونىمدەرىن تانىستىرا وتىرىپ، قىتايمەن تاۋار اينالىمىن ۇلعايتۋعا مۇمكىندىك بولادى»، - دەدى ارمان شاققاليەۆ.
ورتالىقتىڭ الاڭىندا ءبىر ساعات ىشىندە Douying پلاتفورماسىنداعى قازاقستاندىق ازىق-تۇلىك ونىمدەرى ناقتى ۋاقىت رەجيمىندە $15 مىڭ سوماعا ساتىلدى.
QazTrade شيكىزاتتىق ەمەس ەكسپورتتى دامىتۋ جانە ىلگەرىلەتۋ سالاسىنداعى ۇلتتىق ينستيتۋت پەن SOHO كومپانياسى «بىرلەسكەن ورتالىق تۋرالى» كەلىسىمشارتقا قول قويىلدى.
كەلىسىمشارت شەڭبەرىندە ۇلتتىق كومپانيالار، قارجى ينستيتۋتتارى جانە بيزنەس قوعامداستىقتارىنىڭ ورتالىقتا ورنالاسۋ جايلى شارتتارى كەلىسىلدى.
ورتالىقتىڭ جياڭسۋ وڭىرىندە دامىعان ينفراقۇرىلىم ەسەبىنەن جۇمىس ىستەۋى قىتاي نارىعىنا قول جەتكىزۋدى جەڭىلدەتەدى جانە ءوز كەزەگىندە «ءبىر بەلدەۋ، ءبىر جول» بويىندا ورنالاسقان ورتالىق ازيانىڭ بەس ەلىنىڭ قاجەتتىلىكتەرىن قامتاماسىز ەتۋگە ىقپال ەتەدى.
تاراپتار سونداي-اق استانا قالاسىندا بالامالى مۋلتيفۋنكتسيونالدى ورتالىقتى ىسكە قوسۋدى تالقىلادى.
كەشەندى جوبا قىتايلىق جانە قازاقستاندىق تاۋارلاردى ۇسىناتىن جەر عانا ەمەس، مۇندا بيزنەس وكىلدەرى حالىقارالىق سەرىكتەستەرمەن كەلىسىمشارتتار جاساسىپ، ىسكەرلىك كەلىسسوز جۇرگىزىپ، قارجىلىق جانە كونسالتينگتىك قىزمەتتەر الىپ، ساۋدا كەلىسىمدەرىن راسىمدەي الادى.