وتاندىق تاۋار وندىرۋشىلەرمەن جاسالعان كەلىسىمشارتتار ارتىپ كەلەدى - پرەمەر- مينيستر

استانا. KAZINFORM - بۇگىن ەلورداداعى «ادال ازامات. ادال ەڭبەك. ادال بيزنەس» فورۋمىندا پرەمەر- مينيستر ولجاس بەكتەنوۆ وتاندىق تاۋار وندىرۋشىلەردى قولداۋعا قاتىستى پىكىر ايتتى.

«وڭىرلەردى ارالاعاندا كەزدە، قۋاتى 20-30 پايىزعا عانا جۇكتەلگەن زاماناۋي جانە باسەكەگە قابىلەتتى كاسىپورىنداردى ءجيى كورەمىن. سەبەبىن سۇراي كەلە، ولاردىڭ مەملەكەتتىك ورگاندارداعى، ۇلتتىق كومپانيالارداعى، ءىرى جەكە كاسىپورىندارداعى كونكۋرسقا قاتىسا الماي جاتقانى ءمالىم بولىپ جاتىر. ءبىز وسى ماسەلەمەن اينالىسىپ، قاجەت ءبىرقاتار شەشىمدى قابىلدادىق. اتاپ ايتقاندا، مەملەكەتتىك ساتىپ الۋدا قازاقستاندىق وندىرۋشىلەردەن باسىم تارتىپتە ساتىپ الىناتىن تاۋارلاردىڭ ءتىزىمى ءۇش ەسەدەن استام كەڭەيتىلدى. قازىر بۇل تىزىمگە 4500 ءونىم اتاۋى ەندى. ءبىز قازىردىڭ وزىندە العاشقى ناتيجەلەردى كورىپ وتىرمىز. 9-ايدىڭ قورىتىندىسى بويىنشا وتاندىق تاۋار وندىرۋشىلەرمەن جاسالعان كەلىسىمشارت سوماسى 31 پايىزعا ءوسىپ، 167 ميلليارد تەڭگەنى قۇرادى»، - دەدى و. بەكتەنوۆ.

ونىڭ ايتۋىنشا، وتاندىق تاۋار وندىرۋشىلەردى قولداۋ، ساتىپ الۋ مەرزىمىن وڭتايلاندىرۋ ماقساتىندا «سامۇرىق- قازىنا» قورىنىڭ ساتىپ الۋ ءتارتىبى وزگەرتىلدى.

«وتاندىق تاۋار وندىرۋشىلەردى شيكىزاتپەن قامتاماسىز ەتۋ تەتىگى زاڭمەن بەكىتىلدى. ول ءتۇستى مەتاللۋرگيانىڭ نەگىزگى ونىمدەرى بويىنشا قولدانىلادى. بۇل تۇرعىدا ءتيىستى 25 كەلىسىم جاسالدى. قازىر بۇل قادامدار اليۋميني مەن مىستى ىشكى وڭدەۋدى ەكى ەسەگە ارتتىرۋعا مۇمكىندىك بەردى»، - دەدى ۇكىمەت باسشىسى.

بۇدان بۇرىن حابارلانعانداي، فورۋم بارىسىندا پرەمەر- مينيستر ەلگە جاناشىرلىق تانىتقان كاسىپكەرلەرگە العىس ايتتى.

سونىمەن قاتار ول ۇكىمەت ءىرى بيزنەستىڭ اينالاسىندا شاعىن جانە ورتا بيزنەس بەلدەۋىن دامىتۋدا ەلەۋلى الەۋەتتى كورىپ وتىرعانىن اتاپ ءوتتى.