وتاندىق ءسۇت ءوندىرىسىنىڭ دامۋىن قانداي فاكتورلار تەجەپ تۇر

استانا. KAZINFORM - ەلىمىزدە جىلىنا 2,7 ميلليون توننا ءسۇت وندىرىلەدى. اتالعان سالانىڭ قازىرگى جاي-كۇيى تۋرالى تولىعىراق اۋىل شارۋاشىلىعى ءمينيسترى ايداربەك ساپاروۆ ايتىپ بەردى.

«مال شارۋاشىلىعى ونىمدەرىن وڭدەۋدەگى نەگىزگى باعىتتار - ءسۇت، ەت، تەرى جانە ءجۇندى قايتا وڭدەۋ. جەكە توقتالساق، ەلىمىزدە جىلىنا 2,7 ميلليون توننا ءسۇت وندىرىلەدى، قازىر 180 كاسىپورىن جۇمىس ىستەپ تۇر. بىلتىر جالپى سوماسى 584,8 ميلليارد تەڭگە بولاتىن ءسۇت ونىمدەرى ءوندىرىلدى. بۇگىندە ءسۇت ونىمدەرىن وڭدەۋدىڭ دامۋىن تەجەپ تۇرعان فاكتورلار - شيكىزاتتىڭ جەتكىلىكسىزدىگى جانە ونىڭ قىمباتتىعى. بۇل دايىن ءونىمنىڭ قۇنى مەن وتاندىق ءونىمنىڭ يمپورتپەن باسەكەگە قابىلەتىنە تىكەلەي اسەر ەتەدى»، - دەدى ايداربەك ساپاروۆ ۇكىمەت وتىرىسىندا.

سونداي-اق، ۆەدومستۆو باسشىسى ءسۇت جانە ءسۇت ونىمدەرى سالاسىندا قولعا الىنىپ جاتقان ءبىرقاتار جوبانى تىلگە تيەك ەتتى.

«يمپورتتى الماستىرۋ جانە وتاندىق ءسۇت ونىمدەرى قۋاتىن ارتتىرۋدا سولتۇستىك قازاقستان وبلىسىنىڭ تاجىريبەسى بويىنشا جوبالار ىسكە اسىرىلۋدا. جوبالاردى ىسكە اسىرۋ 115 ءىرى تاۋارلىق-ءسۇت فەرماسىن قۇرۋعا، وتاندىق ءسۇت زاۋىتتارىن ساپالى شيكىزاتپەن قامتاماسىز ەتۋگە جانە ءسۇت-شيكىزاتىنىڭ جەتكىلىكسىزدىگى پروبلەماسىن شەشۋگە مۇمكىندىك بەرەدى»، - دەيدى ول.

اۆتور
داۋلەت ىزتىلەۋ