وتانداستارىمىزدى شەت ەلدە جۇمىسقا ورنالاستىراتىن اگەنتتىكتەر قىزمەتىن ءبىر جۇيەگە كەلتىرۋ قاجەت - بەكتەنوۆ

استانا. KAZINFORM - شەت ەلدەردە قازاقستان ازاماتتارىن جۇمىسقا ورنالاستىراتىن جەكە اگەنتتىكتەردىڭ قىزمەتىن ءبىر جۇيەگە كەلتىرۋ قاجەت. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.

«قازىرگى ۋاقىتتا شەتەلدە جۇمىس ىستەپ جاتقان نەمەسە سوندا جۇمىسقا ورنالاسقىسى كەلەتىن قازاقستاندىقتار كوپ. بۇل ولاردىڭ ەڭبەك قاتىناستارىن زاڭداستىرۋدى، قۇقىقتارىن قورعاۋدى تالاپ ەتەدى. ولارعا جالاقى تولەمەۋ، مەديتسينالىق قىزمەت كورسەتپەۋ، كەلىسىمشارتتار ورەسكەل بۇزىلعان فاكتىلەر بىزگە بەلگىلى. سوندىقتان قازىر ءتيىستى ۇكىمەتارالىق كەلىسىمدەردى بەكىتۋ بويىنشا جۇمىستار جۇرگىزىلىپ جاتىر. قازىردىڭ وزىندە شەت ەلدەردە ءبىزدىڭ ازاماتتاردى جۇمىسقا ورنالاستىراتىن جەكە اگەنتتىكتەردىڭ قىزمەتىن ءبىر جۇيەگە كەلتىرۋ قاجەت. قازاقستاندىقتار كەلىسىمشارت بويىنشا سەنىمدى كەپىلدىك الۋعا ءتيىس»، - دەدى ۇكىمەت باسشىسى.

وسى ورايدا ولجاس بەكتەنوۆ ەڭبەك مينيسترلىگىنە اتالعان باعىتتا كەشەندى شارالار قابىلداۋدى تاپسىردى.

«سونىمەن قاتار شەت مەملەكەتتەردە جۇمىس ىستەگىسى كەلەتىندەر ءۇشىن كاسىپتىك جانە تىلدىك دايارلاۋ ورتالىقتارىن اشۋعا بولادى. مىسالى، ولاردى شىعىس قازاقستان، تۇركىستان جانە الماتى وبلىستارىندا اشۋ جوسپارلانعان. وسى وڭىرلەردىڭ اكىمدەرى بۇل جۇمىستى جەدەلدەتۋى قاجەت. باسقا وڭىرلەر دە وسى تاجىريبەنى پايدالانۋىنا بولادى»، - دەدى ول.

پرەمەر-مينيستر قابىلدانىپ جاتقان بارلىق جۇيەلى شارالاردى ىسكە اسىرۋ ساپالى جۇمىسپەن قامتۋعا جانە حالىقتىڭ تابىسىن ارتتىرۋعا ىقپال ەتەتىندىگىن ايتتى.

«ءوڭىر اكىمدەرىنە تۇراقتى جۇمىس ورىندارىن قۇرۋعا باسا نازار اۋدارىپ، جۇمىسقا ورنالاستىرۋ جونىندەگى جوسپارلاردىڭ ورىندالۋىن جەكە باقىلاۋعا الۋدى تاپسىرامىن»، - دەدى ۇكىمەت باسشىسى.

اۆتور

مارلان جيەمباي