وسكەمەندە جەر سىلكىنسە 10 مىڭعا جۋىق عيمارات قيراۋى مۇمكىن

وسكەمەن. KAZINFORM - وسكەمەن قالاسىندا جەر سىلكىنىسىنىڭ ىقتيمال زارداپتارىن باعالايتىن قاۋىپسىزدىك پاسپورتى جاريالاندى. سول قۇجاتقا سايكەس، 7 بالعا دەيىنگى جەر سىلكىنىسى كەزىندە 9768 عيمارات قيراۋى مۇمكىن.

قالا سەيسميكالىق قاۋىپتى ايماقتا ورنالاسقان. مۇندا 7 بالعا دەيىنگى جەر سىلكىنىسى قاۋپى بار. بۇدان بولەك، سەيسميكالىق نورمالار ەسكەرىلمەي سالىنعان تاعى 788 نىسان قاۋىپ ايماعىندا تۇر. ونىڭ ۇستىنە وسكەمەن اۋماعىندا بىردە-ءبىر ستاتسيونارلىق سەيسميكالىق ستانتسيا تىركەلمەگەن.

ش ق و قۇرىلىس باسقارماسى جوبالىق- سمەتالىق ءبولىمىنىڭ باسشىسى گۇلميرا ساتبايەۆانىڭ ايتۋىنشا، وبلىستا عيماراتتاردى بەكىتە ءتۇسۋ بويىنشا جۇيەلى جۇمىس جۇرگىزۋ قاجەت.

- كەلەسى كەزەڭ - تۇرعىن ۇيلەردى پاسپورتتاۋ. قالا سەيسميكالىق قاۋىپتى ايماق دەپ تانىلعانعا دەيىن سالىنعان الەۋمەتتىك ماڭىزى بار نىساندار مەن كوپقاباتتى ۇيلەرگە ەرەكشە كوڭىل بولىنەدى، - دەيدى ول.

وسى رەتتە، توتەنشە جاعدايلار دەپارتامەنتى شىعىس قازاقستاننىڭ تاۋلى ولكە ەكەنىن ەسكە سالدى. سوڭعى ەكى جىلدا مۇندا ونلاين رەجيمدە جۇمىس ىستەيتىن 12 سەيسميكالىق داتچيك ورناتىلدى. بارلىق دەرەك اۆتوماتتى تۇردە الماتىداعى ورتالىق وبسەرۆاتورياعا جىبەرىلەدى.

- سەيسميكالىق داتچيكتەر ءتىپتى ءالسىز جەر استى دۇمپۋلەرىن تىركەپ، جەدەل ارەكەت ەتۋگە مۇمكىندىك بەرەدى، - دەيدى ت ج الدىن الۋ باسقارماسىنىڭ اعا ينجەنەرى اياۋلىم كەكيەۆا.

وڭىردەگى سوڭعى قۋاتتى جەر سىلكىنىسى 1990 -جىلى زايسان اۋدانىندا بولعان. ول كەزدە 9 مىڭعا جۋىق ءۇي قيرادى. جەر سىلكىنىسىنىڭ وشاعى ءبىرجان اۋىلىنىڭ ماڭىندا بولعان ەدى.

ەسكە سالساق، وسىعان دەيىن ميانماداعى جەر سىلكىنىسىنەن قازا تاپقاندار سانى 3,5 مىڭنان اسقانى حابارلانعان.

اۆتور

تالعاتجان مۇحامەتبەك ۇلى