وسكەمەندە جەر سىلكىندى

وسكەمەن. KAZINFORM - وسكەمەن قالاسىندا 2-3 باللدىق جەر سىلكىنىسى تىركەلدى.2-شىلدە كۇنى ساعات 23:15-تە توتەنشە جاعدايلار مينيسترلىگىنىڭ سەيسميكالىق ستانسالار جەلىسى جەر سىلكىنىسىن تىركەدى.

جەر سىلكىنىسىنىڭ وشاعى الماتى قالاسىنان سولتۇستىك- شىعىسقا قاراي 859 شاقىرىم جەردە ورنالاسقان.

بۇل - شىعىس قازاقستان وبلىسى ۇلكەن نارىن اۋىلىنان 70 شاقىرىم قاشىقتىقتا.

جەراستى دۇمپۋلەردى وسكەمەن قالاسىنىڭ تۇرعىندارى سەزدى.

قۋاتى - 2-3 بالل.

ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، جەر سىلكىنگەن كەزدە قۇلاعان اۋىر جيھازداردان ساق بولۋ كەرەك.

«بالكونعا جۇگىرمەڭىز، تەرەزەلەر مەن اۋىر زاتتاردان الىس تۇرىڭىز. ەگەر جەر سىلكىنىسىنىڭ كۇشى از بولسا عيماراتتان شىقپاڭىز، دۇمپۋلەردىڭ اياقتالۋىن كۇتىڭىز. ليفتتى پايدالانباڭىز. ەگەر كوشەدە بولساڭىز، عيماراتتار مەن ەلەكتر جەلىسى جانىنان اۋلاق بولىڭىز، سەبەبى ەلەكتر سىمدارىنىڭ ءۇزىلۋ قاۋپى بار»، - دەلىنگەن اقپاراتتا.

اۆتور
تالعاتجان مۇحامەتبەك ۇلى