وسكەمەندە جانارماي ستانسياسىن توناماق بولعان ەر ادام 3 جىلعا سوتتالدى

وسكەمەن. KAZINFORM - وسكەمەن قالاسىنداعى جانارماي قۇيۋ بەكەتىنە بەنزيندى ارامەن قاراقشىلىق شابۋىل جاساعان ەر ادامعا قاتىستى سوت ۇكىمى شىقتى.

قالالىق №2-سوتىندا ق ر قىلمىستىق كودەكسىنىڭ 192-بابى 1-بولىگىمەن (قاراقشىلىق) ءىس قارالدى. بەلگىلى بولعانداي، ايىپتالۋشى قىلمىستىق ارەكەتىن الدىن الا جوسپارلاپ العان.

«2024 -جىلدىڭ شىلدە ايىندا ول بەنزيندى ارا مەن كيىم ساتىپ الىپ، ونى جالعا العان پاتەرىنە تىعىپ قويعان. سودان سوڭ 19-شىلدە كۇنى ءۇلبى جاعاسىنا تاكسيمەن جەتىپ، كيىمىن اۋىستىرادى. اباي-شاكارىم داڭعىلدارىنىڭ قيىلىسىنداعى جانارماي قۇيۋ بەكەتىنە جاياۋ بارىپ، ونداعى كليەنتتەردىڭ كەتىپ قالعانىن توسىپ تۇرعان»، - دەلىنگەن سوتتىڭ باسپا ءسوز قىزمەتى تاراتقان مالىمەتتە.

ءساتى كەلگەندە بەتىنە ماسكا تاعىپ، ىشكە كىرەدى. سول كەزدە عيماراتتا كاسسير مەن كۇزەتشى وتىرعان. بەنزيندى ارانى قوسقان قاراقشى اقشا تالاپ ەتكەن. كۇزەتشى وعان قاراي سۋسىندار قۇيىلعان بانكالاردى لاقتىرا جونەلەدى. سونىڭ ءبىرى وتالىپ تۇرعان بەنزيندى اراعا ءتۇسىپ، ول سىنىپ قالعاننان كەيىن سوتتالۋشى قاشىپ كەتكەن.

سوت بارىسىندا ايىپتالۋشى ءوز كىناسىن تولىقتاي مويىنداپ، قاتتى وكىنەتىنىن ايتتى. سوت شەشىمىمەن ول كىنالى دەپ تانىلىپ، 3 جىلعا باس بوستاندىعىنان ايىرىلدى. ەر ادام ءوز جازاسىن قاۋىپسىزدىگى ورتاشا تۇزەتۋ مەكەمەسىندە وتەيدى. ۇكىم ءالى زاڭدى كۇشىنە ەنگەن جوق.

ەسكە سالساق، وسىعان دەيىن وسكەمەندە جۇرگىزۋشى كۋالىگىنە ەمتيحان تاپسىرعانداردان 40 ميلليون تەڭگە سىياقى العان ح ق و قىزمەتكەرلەرى سوتتالعانى حابارلانعان.

اۆتور
تالعاتجان مۇحامەتبەك ۇلى