وسكەمەندە ءيتىن ۇيدە جالعىز قالدىرىپ كەتكەن ايەلگە 40 مىڭ تەڭگە ايىپپۇل ءسالىندى

وسكەمەن. KAZINFORM - وسكەمەن قالاسىندا ءيتىن ۇيدە جالعىز قالدىرىپ كەتكەن ايەل ادامعا 39820 تەڭگە ايىپپۇل سالىندى.

وسىعان بايلانىستى سوت ءىسى قالالىق اكىمشىلىك قۇقىق بۇزۋشىلىق ىستەر جونىندەگى سوتتا قارالعان. بەلگىلى بولعانداي، ايەل ءيتىن ۇيدە قاماپ، جۇمىسقا كەتىپ قالعان. ءيتتىڭ ۇرە بەرگەنىنەن مەزى بولعان كورشىسى پوليتسيا شاقىردى. ۋچاسكەلىك پوليتسەي ءۇي جانۋارلارىن ۇستاۋ تالاپتارىن ورىنداماعانى ءۇشىن ءيتتىڭ يەسىنە اكىمشىلىك حاتتاما تولتىرعان.

- سوت بارىسىندا ءتارتىپ ساقشىسى وزىنە ارىز تۇسكەنىن، مەكەنجايعا كەلگەندە پاتەردە ەشكىمنىڭ جوقتىعىن، ىشتە ءيتتىڭ ءۇرىپ جاتقانىن ايتتى. ءۇي جانۋارلارىن ۇستاۋ جانە سەرۋەندەتۋ ەرەجەلەرىنە سايكەس ولاردى قاراۋسىز قالدىرۋعا جول بەرىلمەيدى. سوندىقتان ايەلگە 10 ا ە ك (39820 تەڭگە) مولشەرىندە ايىپپۇل سالىندى، - دەلىنگەن سوت ماتەريالدارىندا.

ايتا كەتەيىك، بۇل زاڭدى ەكىنشى رەت بۇزعاندار 20 ا ە ك كولەمىندە ايىپپۇل تولەۋگە مىندەتتەلەدى.

ەسكە سالساق، وسىعان دەيىن وسكەمەندە ءبىر اپتادا 11 ادامدى ءيت قاپقانى حابارلانعان.

اۆتور

تالعاتجان مۇحامەتبەك ۇلى