وسكەمەندە باستىعىنىڭ كولىگىن ساتىپ جىبەرگەن ازامات سوتتالدى
وسكەمەن. KAZINFORM - وسكەمەن قالاسىنداعى اۆتوجۋۋلاردىڭ بىرىندە جۇمىس ىستەپ جۇرگەن ەر ادام باستىعىنىڭ كولىگىن ساتىپ جىبەرگەن.
ش ق و سوتى باسپا ءسوز قىزمەتىنىڭ مالىمەتىنە سۇيەنسەك، سەمەي قالاسىنىڭ تۇرعىنى وسكەمەنگە كەلىپ، اۆتوجۋۋلاردىڭ بىرىنە جۇمىسقا تۇرعان. سول كەزدە اۆتوجۋۋ يەسى ءوزىنىڭ جول اپاتىنان قيراپ تۇرعان كولىگىن ينتەرنەت ارقىلى ساتۋعا قويعان.
كولىككە قىزىعۋشىلىق تانىتىپ قوڭىراۋ شالعان ازاماتتارعا باستىعىنىڭ تاپسىرماسىمەن اۆتوجۋۋ جۇمىسشىسى جاۋاپ بەرىپ جۇرگەن.
- جەڭىل اقشا تابۋدى كوزدەگەن ايىپتالۋشى سامار اۋدانىنان حابارلاسقان ادامعا كولىكتى 350 مىڭ تەڭگەگە ساتىپ جىبەردى. بۇنى ءبىلىپ قويعان كولىك يەسىنىڭ ارىزىنان سوڭ اۆتوجۋۋ جۇمىسشىسىنا قاتىستى الاياقتىق بابى بويىنشا ءىس قوزعالعان، - دەلىنگەن اقپاراتتا.
سوت شەشىمىمەن سوتتالۋشى ەكى جىلعا باس بوستاندىعىنان ايىرىلدى. ۇكىم ءالى زاڭدى كۇشىنە ەنگەن جوق.
ەسكە سالساق، بۇعان دەيىن «بيپەك- اۆتو» ءىسى بويىنشا سوت ۇكىمى شىققانى حابارلانعان.