وسكەمەندە 7 بالاسىنا اليمەنت تولەمەگەن ايەلگە قاتىستى قىلمىستىق ءىس قوزعالدى
وسكەمەن. KAZINFORM - وسكەمەن قالاسىندا ايەل ادامنىڭ 7 بالاسى الدىنداعى اليمەنت بويىنشا قارىزى 9 ميلليون تەڭگەگە جەتكەن.
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، پوليتسياعا الەۋمەتتىك كومەككە مۇقتاج بالالاردى قولداۋ ورتالىعىنىڭ ديرەكتورى جۇگىنگەن.
ءوز سوزىندە ول 42 جاستاعى وسكەمەن تۇرعىنىنىڭ سوت شەشىمىمەن بەلگىلەنگەن اليمەنت تولەۋ مىندەتىن ورىنداماي كەلە جاتقانىن جەتكىزدى.
- ايەل ادامنىڭ 7 كامەلەتكە تولماعان بالاسى ورتالىقتا تاربيەلەنىپ جاتىر. ونىڭ اليمەنت بويىنشا قارىزى 9 ميلليون تەڭگەدەن اسقان. ءتارتىپ ساقشىلارى اتالعان فاكتى بويىنشا قىلمىستىق ءىس قوزعادى. قازىرگى ۋاقىتتا تەرگەۋ امالدارى جۇرگىزىلۋدە، - دەپ حابارلادى ۆەدومستۆو وكىلدەرى.
وسى رەتتە، پوليتسيا اليمەنت تولەۋدەن جالتارعاندار قىلمىستىق جاۋاپكەرشىلىككە تارتىلاتىنىن ەسكەرتتى.
ەسكە سالساق، بۇعان دەيىن ب ق و-دا اليمەنتتەن جالتارعان قوس ازاماتتىعى بار ەر ادامعا جارتى ميلليون تەڭگە ايىپپۇل سالىنعانى حابارلانعان.
اۆتور
تالعاتجان مۇحامەتبەك ۇلى