دارىگەرلەردىڭ مالىمەتىنشە، زارداپ شەككەن ەر ادامنىڭ دەنەسىنىڭ 90 پايىزىن كەڭ اۋقىمدى تەرميالىق كۇيىك شالىپ، تىنىس الۋ جولدارى مەن كوزى زاقىمدانعان.
«كازسينك» كومپانياسىنىڭ مالىمەتىنشە، ەمدەۋ شارالارىن كۇشەيتۋ ماقساتىندا رەسپۋبليكالىق دەڭگەيدەگى مامانداردى تارتۋ تۋرالى شەشىم قابىلدانعان.
- جۋىق ارادا وسكەمەنگە ارنايى بورتپەن ۇلتتىق شۇعىل مەديتسينانى ۇيلەستىرۋ ورتالىعىنىڭ دارىگەرلەرى كەلەدى. بۇعان دەيىن تەلەمەديتسينالىق كەڭەس وتكىزىلىپ، سونىڭ بارىسىندا ناۋقاستى ارى قاراي ەمدەۋ تاكتيكاسى كەلىسىلدى، - دەلىنگەن اقپاراتتا.
قازىرگى ۋاقىتتا ەر ادام دارىگەرلەردىڭ تۇراقتى باقىلاۋىندا. وعان قارقىندى تەراپيا جۇرگىزىلىپ جاتىر.
ەسكە سالساق، وسىعان دەيىن «قازسينك» كاسىپورنىنداعى جارىلىستان ەكى ادام قازا بولىپ، بەسەۋى زارداپ شەككەنى حابارلانعان.