وسپانحاننىڭ جومارتتىعى
استانا. قازاقپارات - جازدىڭ جادىراعان جايما-شۋاق كۇندەرىنىڭ ءبىرى ەدى. الماتىداعى جازۋشىلار وداعىنىڭ عيماراتىنان وسپانحان اعامەن بىرگە شىقتىم. - مەن بيىل ەلۋگە تولامىن، - دەدى ول. - مىنا كوپ قاباتتى مەكەمەگە بارىپ شىعايىقشى. وتكەندە وداقتان وبلىستىق پارتيا كوميتەتى حاتشىسىنا حات جولدانىپ ەدى. سونىڭ ناتيجەسىن بىلەيىك!
ساتيريك اقىننىڭ جانىندا تومپاڭداپ ءجۇرىپ كەلەمىن. اعا ءارتۇرلى ازىلدەردى ايتىپ، اراسىندا ءماز بولىپ كۇلىپ قويادى.
ون ەكى قاباتتى اينەكپەن كومكەرىلگەن عيماراتقا كەلدىك. وسپانحان اعا اۋىزدا وتىرعان كۇزەتشى جىگىتكە كەلۋ سەبەبىن ۇقتىردى. كۇزەتشى جىگىت بىزگە استىڭعى قاباتتاعى ەسىكتەردىڭ ءبىرىن نۇسقادى. وندا ءبىزدى قارسى العان جاس كەلىنشەك كۇلىمسىرەدى دە:
- اعا، وداقتان تۇسكەن حات جامبىل اۋداندىق پارتيا كوميتەتىنە جىبەرىلدى. ءسىزدى وزدەرى شاقىرىپ، ەلۋ جىلدىعىڭىزدى اتاپ وتەدى، - دەدى.
جاقسى حاباردى ەستىگەننەن سوڭ، ءبىز عيماراتتان كوڭىل-كۇيىمىز كوتەرىڭكى شىقتىق. تىسقا شىققاننان كەيىن وسپانحان اعا ماعان:
- مەنىڭ ەلۋ جىلدىعىمدا ءوزىڭ بولاسىڭ، سەنى شاقىرتامىن، كەلمەي قالما؟! - دەدى.
- ارينە، اعا، حابار بەرسەڭىز قۋانا كەلەمىن،- دەدىم.
وسپانحان اعانىڭ ەلۋ جىلدىعى الماتى وبلىسى، جامبىل اۋدانىندا دۇركىرەپ ءوتتى. اۋدان باسشىلارى تۋما تالانت يەسىن قۇشاق جايا قارسى الىپ، سىي-قۇرمەتكە بولەدى. ءۇش كۇن بويى وسپانحان اۋباكىروۆتى اۋدان باسشىسىنىڭ جۇرگىزۋشىسى باستىعىنىڭ ماشيناسىمەن سەرۋەندەتتى. توي اياقتالعاننان كەيىن اۋدان باسشىلارى وسپانحان اعاعا «موسكۆيچ-412» اۆتوكولىگىن سىيعا تارتادى.
ماناعى جۇرگىزۋشى جىگىت سۋ جاڭا اۆتوكولىكتى ءوزى ايداپ، وسپانحان اعانى الماتىداعى جامبىل مەن بايزاقوۆ كوشەلەرىنىڭ قيىلىسىنداعى جازۋشىلار ءۇيىنىڭ الدىنا اكەلەدى. اعامىز ماشيناسىنان ءتۇسىپ، باسىن ءارلى-بەرلى شايقاپ:
- بالا، اعاڭنىڭ ءتىلىن ال! مەن بۇل ءيتتى دىرىلداتىپ ءمىنىپ جۇرە المايمىن. ايدا بار، كوزىن جوعالت، بۇل پالە بۇگىننەن باستاپ سەنىكى، كانە، وتىر، - دەپ وسەكەڭ جۇرگىزۋشى جىگىتتى ماشيناعا قايتا وتىرعىزىپ ەسىگىن جاۋىپ: - ايدا، زىمىرات ءيتىڭىزدى، - دەپ كۇلىپ قالا بەرگەن ەكەن. ءسويتىپ، وسپانحان اۋباكىروۆ سىيعا العان اۆتوكولىگىن جۇرگىزۋشىگە مىنگىزىپ جىبەرگەن.
بۇل تۋرالى عابباس قابىش ۇلىنىڭ «ساعىنىش سازى» كىتابىندا جازىلىپتى. عابباس قابىش ۇلى اعامىز وسپانحاننىڭ «اتىمتاي جومارتتىعىن» وسىلايشا ەسكە سالىپ وتىر.
ساتيرا ساربازىنىڭ جىر جيناقتارى ءالى كۇنگە دەيىن وقىرمان نازارىندا ەكەندىگىندە ەشقانداي شۇبا جوق. ساتيريكتىڭ «ادام جەتەكتەگەن ادام» سىقاعىنداعى:
...«جەتەكتەگى جەتەگىڭ،
جەتەسىز بولسا نەتەسىڭ؟
جەتەكتەپ الىپ قايتادان
اۋىلىڭىزعا كەتەسىڭ» دەگەن شۋماقتارى ەل اۋزىنان تۇسپەي كەلەدى. ءتىلى توتيايىنداي ساربازدىڭ كىسىگە وي سالار وبرازدى ولەڭدەرى ەرىكسىز سۇيسىندىرەدى. وقىعان سايىن ەزۋىڭ جيىلماي كۇلە بەرەسىڭ. بۇل وسپانحان اعانىڭ وزىنە عانا ءتان شەبەرلىگى مەن تاپقىرلىعى. «وسى ولەڭ جولدارى ماعان ارنالعان جوق پا؟» دەپ ويعا قالاسىڭ...
قاراباي ءابۋ ۇلى
«انا ءتىلى» گازەتى. 2014- جىل