اگەنتتىك مالىمەتىنشە، يران قارۋلى كۇشتەرى ا ق ش اسكەري-تەڭىز كۇشتەرىنىڭ كەمەلەرى پارسى شىعاناعىنا كىرۋگە نەمەسە يراندىق كەمەلەردى قۋدالاۋعا ارەكەت جاساعان جاعدايدا جاۋاپ شارالارىن قابىلدايدى.
يراننىڭ Fars News Agency اگەنتتىگى بۇعان دەيىن سوڭعى ساعاتتاردا ورمۋز بۇعازىندا يران قارۋلى كۇشتەرى مەن امەريكالىق اسكەري كەمەلەر اراسىندا جەكەلەگەن قاقتىعىستار بولعانىن حابارلاعان.
مالىمەتكە سايكەس، ا ق ش-تىڭ يران مۇناي تانكەرىنە جاساعان شابۋىلىنان كەيىن يران اسكەري- تەڭىز كۇشتەرى ايماقتاعى امەريكالىق اسكەري كەمەلەرگە زىمىراندار مەن كاميكادزە-دروندار ارقىلى سوققى جاساعان. بۇعان جاۋاپ رەتىندە امەريكالىق كۇشتەر يراننىڭ وڭتۇستىك جاعالاۋىنداعى پورتتارعا شابۋىل جاساعان.
يران ا ق ش-تى ازاماتتىق نىساندارعا سوققى جاسادى دەپ ايىپتادى. تەگەران مالىمەتىنشە، ازاماتتىق كەمەگە جاسالعان شابۋىل سالدارىنان ءبىر ادام قازا تاۋىپ، تاعى ون ادام جارالانعان. سونىمەن قاتار ءتورت ادامنىڭ ءىز-ءتۇزسىز جوعالعانى حابارلاندى.
ءوز كەزەگىندە ا ق ش قارۋلى كۇشتەرى ورتالىق قولباسشىلىعى - CENTCOM يران «ەشقانداي ارانداتۋسىز» ورمۋز بۇعازى ارقىلى ءوتىپ بارا جاتقان ا ق ش اسكەري-تەڭىز كۇشتەرىنىڭ كەمەلەرىنە شابۋىل جاساعانىن مالىمدەدى. ال امەريكالىق تاراپ «ءوزىن-ءوزى قورعاۋ ماقساتىندا» جاۋاپ قايتارعانىن ايتتى.
كەيىنىرەك يران شەتەلدىك مۇناي تانكەرىن ۇستاعانىن حابارلادى. تەگەراننىڭ مالىمدەۋىنشە، كەمە ايماقتاعى جاعدايدى يران مۇنايىنىڭ ەكسپورتىنا زيان كەلتىرۋ ماقساتىندا پايدالانۋعا تىرىسقان.
ايتا كەتەيىك، كەشە ا ق ش يراننىڭ ەكى پورتىنا شابۋىل جاساعانىن حابارلادىق.