ورتاق تۇركى ءالىپبي ۇلگىسى تۋرالى كەلىسىم ساياسي شەشىم ەمەس - ساياسات نۇربەك

استانا. KAZINFORM - تۇركى الەمىنىڭ ورتاق ءالىپبيى كوميسسياسىنىڭ 34 ارىپتەن تۇراتىن ءالىپبي ۇلگىسىنە قاتىستى قابىلداعان كەلىسىمى ساياسي شەشىم ەمەس. بۇل تۋرالى بۇگىن عىلىم جانە جوعارى ءبىلىم ءمينيسترى ساياسات نۇربەك ايتتى.

«وزدەرىڭىزگە ءمالىم، تۇركى مەملەكەتتەرىنىڭ وتىرىستارىندا عىلىمي قاۋىمداستىقتارعا، عالىمدارعا ورتاق ءالىپبي ۇلگىسىن قاراستىرۋعا قاتىستى بىرنەشە تاپسىرما بەرىلگەن. سوندىقتان بىرنەشە كەزدەسۋ بولدى. حالىقارالىق تۇركى اكادەمياسىنىڭ نەگىزىندە بىرنەشە تالقىلاۋ قورىتىندىسىنان كەيىن اكادەميا باسشىسى شاين مۇستافايەۆ مىرزا وسىنداي قۇجاتقا قول قويعان. تاعى دا ايتامىن، بۇل ۇكىمەت دەڭگەيىندەگى نەمەسە ساياسي قۇجات ەمەس. تەك عىلىمي قاۋىمداستىق تاراپىنان تالقىلانىپ جاتقان قۇجات»، - دەدى مينيستر.

ايتا كەتەيىك، حالىقارالىق تۇركى اكادەمياسى 9-11-قىركۇيەك كۇندەرى ازەربايجان استاناسىندا تۇركى الەمىنىڭ ورتاق ءالىپبيى كوميسسياسىنىڭ ءۇشىنشى وتىرىسى وتكەنىن حابارلاعان بولاتىن. تاراتىلعان اقپاراتقا قاراعاندا، وتىرىس قورىتىندىسىندا 34 ارىپتەن تۇراتىن ورتاق تۇركى ءالىپبي ۇلگىسى تۋرالى ۇسىنىس بويىنشا كەلىسىمگە قول جەتكىزىلگەن.